Lorenc Trashi ka qenë i pranishëm ditën e sotme në qytetin e tij të Gramshit. Ky qytet festonte edhe 60 vjetorin e vetë, gjë që ishte edhe arsyeja e pranisë së futbollistit të Partizanit. Trashi është nderuar nga qyteti i tij për hir të arritjeve të bërë në karrierë, ku ia ka dalë të shpallet kampion me klubin e Partizanit si dhe ka arritur të sigurojë edhe ftesën e Rejës për të veshur fanellën kuqezi.
Suksese këto të cilat nuk mund të lihen pa u vlerësuar nga vendlindja e tij. Bashkia së bashku me klubin e Gramshit organizuan një festë të veçantë për të nderuar figurat e njohura të tyre, një prej të cilëve ishte edhe Trashi. Ky i fundit me nderimin e bërë ofrohet për të gjithë bashkëqytetarët e tij si një model që ia vlen të ndiqet prej tyre./Sport Ekspres/
