Tirana nuk ka arritur që të fitojë ndeshjen e parë si kampione e Superiores, teksa ka barazuar edhe ndaj Bylisit në shifrat 1-1. Bardheblutë ia kanë dalë në këtë përballje që të shënojnë të parët falë realizimit të Ngosë në minutën e 22 të takimit, ndërsa Dovedan do të acarohej me dy qendër mbrojtësit e ballshiotëve që nuk reaguan mirë në ato momente.
Sallaku do t’i afrohej barazimit me një predhë nga distanca në minutën e 80, teksa do të tronditej traversa e portës së Likës. Një moment i vështirë edhe për gjyqtarët për të kuptuar nëse topi e kaloi apo jo vijën, ndërsa këtë rast mund ta zgjidhte vetëm teknologjia. Megjithatë në minutat e fundit do të ishte sërish Sallaku që nga distanca do të ishte i frikshëm për Likën, duke gjetur rrjetën. Gjithsesi kjo ndeshje nuk kishte vlerë për objektivat e të dyja ekipeve dhe Tirana ka bërë ceremoninë zyrtare të shpalljes si kampion i sezonit 2019-2020. Më poshtë mund të ndiqni edhe intervistat e protagonistëve për “Supersport”:
Halili: “Shiko, unë mendoj se te klubi ka nevojë për psikolog. Unë kam bërë psikologun deri tani në skuadër. Kemi bërë edhe presione te lojtarët. Po ta shihni kemi kthyer sezonin që pas ndeshjes ndaj Partizanit në derbi. U kemi thënë që nëse humbisni edhe këtë ndeshje, për çfarë ju duam, për çfarë ju paguajmë? Po ju jap edhe një lajm që Egbo do të vazhdojë të jetë trajneri i Tiranës. Vetëm se do të ulemi dhe të flasim prapë me të. Do i shtojë edhe stafin, duhet të ketë edhe një ndihmës si zëvendës trajner. Do t’i shtoj stafin pasi duam të shkojmë në Europë dhe të lëmë gjurmë, jo të ikim si kalimtar”.
Ilir Meta: “Sot jemi të gjithë tifozë të Tiranës, që e meritoi fitimin e titullit kampion. E meritonte një ringritje të tillë pas shumë momenteve të vështira. E vesha me shumë dashuri këtë fanellë dhe një prej tyre ma ka dhënë edhe Rudi Vata. I urojmë suksese në arenat ndërkombëtare tani”.
Arbi Laçi: “Kjo është dita më e bukur e jetës sime. Medaljen ia dhashë vajzës sime dhe ndihemi vërtet mirë. Ky është një cikël i ri dhe Tirana duhet të jetë pararoja e ekipeve të tjera. Goli i Kobinës ndaj Partizanit? E dua fort që pas atij goli. Për batutë, se jemi në festë. Ia dërgoj ende shokëve të mi videon e atij goli”.
Armand Duka: “Nëse edhe dikush do të merrte një laps dhe letër dhe do të bënte nje renditje të ekipeve, nuk do të kishte shumë ndryshime me këto që janë. Po flasim për ata që janë njohës të mirë të futbollit. Më vjen mirë që futbolli rifilloi dhe për këtë kemi pasur bashkëpunimin e të gjitha strukturave. Sigurisht që duhej që kjo ndeshje e fundit të kishte tifozë dhe të festohej me ta, pasi për ta zhvillohet. Megjithatë duhet të urohet Tirana, që u shkëput shumë në dy fazat e fundit dhe Kukësi nuk arriti që ta rivalizonte më tepër. Uroj të jemi sërish këtu për të dhënë Kupa të tjera Tiranës, por edhe skuadrave të tjera shqiptare”.
Egbo: “Unë kur vij dhe marrë një detyrë fus gjithë zemrën time, shpirtin tim, jap gjithçka. Kemi arritur një gjë të madhe dhe kjo nuk ka krahasim. Tani është momenti për të bërë llogaritë tona. E kam thënë edhe dikur që duhet t’i shohim ndeshjet një nga një dhe më pas të bëjmë llogaritë tona, tani është momenti i duhur. Duhet të japësh gjithçka nga vetja dhe nuk duhet të bësh intriga dhe gjëra të këqija. Tirana është një ekip i madh dhe prandaj e duan shumë trajner. Unë kur e mora e dija shumë mirë presionin dhe sesa e vështirë do të ishte. Prandaj fola me Zotin, kërkova ndihmën e tij dhe u vonova pak. Tani do të bëj të njëjtën gjë për të vazhduar”.