Kanë përfunduar edhe dy ndeshjet e orës 18:00 të javës së 32-të të “Abissnet Superiores“. Gara për titullin kampion bëhet edhe më emocionuese, teksa diferenca mes Partizanit dhe Tiranës shkon në vetëm dy pikë. Të kuqtë kanë mposhtur me rezultatin 3-1 Kukësin, ndërsa bardheblutë janë befasuar nga Teuta në “Niko Dovana“. Pas përfundimit të ndeshjeve, protagonistët kanë dhënë intervistat e tyre për mikrofonin e emisionit “Ti Bo Gol” në “Oversport“.
Kolela (Partizani): “Gjëja më pozitive ishte të fitonim sot. Fakti që rivalët tonë humbën sot i jep më shumë vlera fitores sonë. Kujtoj që dikush tha në janar se ne nuk kishim bërë merkato. Ne kemi marrë disa lojtarë dhe kemi rekuperuar Da Silvën, që për një periudhë nuk ishte gati. Por unë jam i kënaqur me çfarë skuadra jep në fushën e lojës dhe në stërvitje. Të gjithë na japin kualitet gjatë javës dhe na ndihmojmë të marrim maksimumin në çdo ndeshje. Jam i lumtur kur fiton skuadra ime. Por nëse kampionati përfundon në këtë moment, ne jemi dy pikë pas. Për këtë nuk jam i lumtur. Derbi? Tani po mendoj për të ngrënë, sepse kam uri. Kemi kohë për ta menduar“./Halit Delibashi-Sport Ekspres/