Bild raportoi se një shofer taksie gjeti një portofol që përmbante paratë dhe dokumentet e Manuel Neuer, por iu mohua shpërblimi i pritur. Taksisti që kishte si pasagjer yllin gjerman, e gjeti portofolin disa orë më vonë teksa pastronte makinën në fund të turnit të tij.
“Emri dhe adresa e Manuel Neuer ishin në letërnjoftimin e tij. Brenda kishte një kartë Visa Platinium, një MasterCard të zezë dhe rreth 800 euro,” thotë ai në një intervistë për Bild. Taksisti i ndershëm vendosi t’ia kthente të gjitha Neuerit, kështu që shkoi në shtëpinë e tij në Lehel, por portieri i njohur nuk ishte aty.
Më pas taksisti shkoi në qytetin e Tegernsee ku futbollisti ka një pronë, por Neuer nuk gjendej as aty. Një nga banorët i tha se menaxheri i Neuerit jetonte afër, kështu që mund të nisej në drejtim të tij. “Ai ma hapi derën, unë dorëzova gjithçka dhe lashë informacionin tim të kontaktit”, tha Hazir S., një shofer taksie, i cili me sa duket donte ta ndante historinë me gazetarët.
Burri, për të kthyer atë që i përkiste Neuerit, ka udhëtuar gjithsej rreth 120 kilometra dhe thuhet se ka shpenzuar deri në 400 euro për karburant. Pas dy javësh ai mori pakon. Ajo përmbante fanellën me autograf të Manuel Neuer. Nuk kishte asnjë mesazh apo falenderim. Në përgjithësi, taksisti mori shumë më pak se sa priste. /Sport Ekspres/