Ndeshja mes Kastriotit dhe Bylisit do të shtyhej pas kërcënimit që kishin marrë arbitrat. Kjo përballje e prapambetur u zhvillua në ditën e sotme dhe përfundoi në shifrat 0-2. Krutanët e nisën në mënyrën më të keqe takimin pasi në të 6 do të ndëshkoheshin me karton të kuq.
Kodra la me 10 lojtarë Kastriotin pas një gjestin antisportiv. Goli i parë i ndeshjes mbërriti nga Kaçorri në minutën e 17 dhe vetëm 20 minuta më vonë, ishte Zhoalison që shënoi golin e dytë për Bylisin me penallti. Pas këtij rezultati, Kastrioti duket i rrëzuar nga Superiorja, ndërsa nga krahu tjetër, ballshiotët janë ende në vallen e mbijetesës. Më poshtë gjeni intervistat e trajnerëve për “Oversport”:
Cela: “Sot ishte e njëjta polici, të njëjtët stjuard. Por kjo ndeshje u la që të zhvillohej në Elbasan. Ishin të drejta vendimet e arbitrit sot, kartoni i kuq i Kodrës dhe penalltia e dhënë për Bylisin. Unë nuk isha dakort vetëm te një karton i dytë i verdhë i munguar te Lajthita. Na u hodh poshtë fati i një sezoni nga veprime të pakontrolluara. Prandaj lojtarët duhet të kalojnë nga moshat për të mbërritur te ekipi i parë. Futbolli është vetëm një lojë, nuk duhet ta përjetojmë kështu finalen. Lojtarët e Bylisit provokonin, ngacmonin, po qëndronin të qetë, ne nuk duhej të reagonim në këtë mënyrë”.
Shensoji: “Jam i kënaqur me tre pikët sot, më pak me lojën. Sot fitoi ekipi që ishte më mirë i përgatitur psikologjikisht. Në Turqi thonë: “Uthulla e fortë e dënon enën e vet”. Kjo ndodhi me Kastriotin, agresiviteti i tepërt e dëmtoi. E paguan faturën e tyre, ishin shumë agresiv. Dogjën veten e tyre. U takova edhe me Celën para ndeshjes, ka bërë shumë mirë si trajner. Bylisi nuk do të largohet nga Superiorja. Na duhej kjo fitore për të vërtetuar se jemi në rrugë të mirë. Tani duam që të fitojmë kundër Partizanit në transfertë, ta thyejmë traditën”.