Bylisi po punon që të përforcohet edhe më shumë në sulm dhe mësohet nga burime të besueshme të Sportekspres.com pranë klubit ballshiot, se lojtari i radhës që pritet të jetë pjesë e ballshiotëve është sulmuesi Mustafa Xhixhiua, i cili së fundmi ka refuzuar një ofertë mjaft të mirë nga Vora. Kur themi e mirë, nënkuptohet që flasim për nivelin e pagesave në Kategorinë e Parë.
Xhixhiua në verë pranoi propozimin e Burrelit dhe me matjanët ka arritur të shënojë tre gola në nëntë ndeshje. Problemet financiare kanë pasur ndikimin e vet edhe në paraqitjen e sulmuesit, që nisur edhe nga forca e ekipit ku ishte nuk kishte mbështetjen e duhur.
Janarin e shkuar ai la Partizanin dhe tek Erzeni regjistroi shifra të mira, pasi shënoi tetë gola në 14 ndeshje. Sulmuesi 23-vjeçar në verë u la i lirë dhe tani do nisë një rrugëtim të ri me ballshiotët, të cilët pritet ta zyrtizojnë Xhixhiuan pjesë të tyre.