Teuta ka marrë tre pikë me shumë vlera ndaj Kastriotit. Durrsakët kaluan në avantazh me anë të Lorenzo Vilas në minutën e 45. Goli i dytë i takimit erdhi nga Oshafi në të 68, teksa pas pasimit të marrë nga Lorenzo Vila, nuk e kishte të vështirë për të gjetur rrjetën.
Kështu ndeshja u mbyll me shifrat 2-0 dhe Martini e kthen Teutën në rrugën e duhur. Durrsakët grumbullojnë tre pikë të tjera dhe janë shumë pranë daljes nga zona e ftohtë pas sezonit që dukej se po shkonte si mos më keq. Më poshtë gjeni intervistat e trajnerëve për “Oversport”:
Martini: “Ishte ndeshje delikate, nuk na lejohej rezultat tjetër. Mungesat bën punën e tyre, duhej t’i tregonim lojtarëve të rinj që janë edhe ata pjesë e ekipit. Ardhja e Kallakut na jep shpejtësi në lojë. Shpresojmë se Kallaku do të jetë gati për të luajtur që në Kupë. Unë i njoh mirë këta lojtarë. Nuk kam bërë asgjë, thjesht u kam treguar veten që ta shohin në pasqyrë, se disa prej tyre kanë dalë edhe kampion me mua”.
Mema: “Ishin disa momente dobësie të tonat që i shfrytëzoi kundërshtari. Jam pak në dyshim për golin e parë që shënoi Teuta. Nuk është e pranueshme që arbitri kishte dorën në xhep për lojtarët e Kastriotit dhe nuk nxirrte karton për Teutën. Nuk po them që e humbëm ndeshjen nga arbitri. Lojtarët tanë duhet të hyjnë në fushë për ta fituar ndeshjen”.