Për herë të parë këtë sezon, Teuta ngre flamurin e bardhë në Shkodër dhe humb ndeshjen me shifrat 1-0. Kjo Vllazni është e vështirë të zbresë nga kreu dhe këtë e dëshmoi edhe njëherë tjetër fusha e lojës. Ndeshja u dominua nga kuqeblutë dhe fatin përfundimtar e vendosi ai gol i Ardit Hoxhajt. Në Shkodër festa vazhdon, teksa tashmë udhëheq kampionatin me 9 pikë më tepër nga Teuta. Në përfundim të këtij takimi kanë komentuar 90 minutat për “Supersport” vetë protagonistët.
Martini (Teuta): “Ishte një ditë e keqe për ne. Vllaznia e meritoi fitoren. Humbja një ditë do të vinte. Ajo që më shqetëson është se ishte ndeshja më e keqe për ne që nga fillimi i kampionatit. Janë shumë pikë në lojë dhe kampionati është i gjatë. Ne do jemi aty për t’i arritur pikët. E njihnim Vllazninë në çdo detaj. Por përjashto 14 minutat e para kur patëm disa raste, në pjesën tjetër e meritonim rezultatin. Ndoshta duhet të ishim treguar më kavalierë, të pasonim më shumë. Kemi bërë gabime elementare në pasime”.
Brdariç (Vllaznia): “Jam tërësisht krenar për ekipin tim. Kemi punuar shumë për të luftuar për këtë pozicion. Kemi shënuar vetëm një gol, por ishte një ndeshje totalisht e merituar. Nuk dua të flas për objektivat e kampionatit dhe çfarë do të ndodhi në fund. Është një sezon i gjatë. Jemi në vendin e parë dhe të jemi me këmbë në tokë. Të kënaqemi me këtë rezultat.
Kartoni i kuq për Hoxhajn? Ishte shumë e pafat për Hoxhajn, sepse nuk donte ta dëmtonte. Nëse shikojmë pamjet duhej të dënohej, megjithëse duhej të mbroja lojtarin tim në atë moment.
Mbajtja e çadrës? E urrej shiun. Nuk dua të sëmurem në javët në vazhdim. Këtu në Shkodër është e pabesueshme, bie shi pafund. Duket qesharake, por nuk ka mundësi tjetër. ”./Halit Delibashi-Sport Ekspres/