Sora, Ishujt Liri, Atalanta, Avelino, Torino… Londër! Ok, ndoshta të renditura kështu, mund të duket sikur pas tri pikave kemi “shkalluar”, por në fakt jo. Po flasim për karrierën e deritanishme të Davide Zapakosta, lojtari që vetëm gjashtë vjet më parë luante në Lega Pro, divizioni i dytë, pra shumë pranë diletantëve, me skuadrën e një qyteze me peisazh të mrekullueshëm, pranë Frozinones. Ishulli Liri është një qyetezë që merr emrin e lumit “Liri” dhe që ka disa ujvara të mrekullueshme. Aty nisi karriera e vërtetë e Zapakostës, edhe pse ky i fundit u rrit te Akademia e Sorës…
Sot, kjo skuadër është mes diletantëve. Në gjashtë vjet, ai ngjiti me shpejtësi shkallët dhe sot e gjen veten në Champions League, duke shënuar në debutim dhe duke gëzuar Konten për 30 mln eurot e shpenzuara. Një telefonatë ditën e fundit, pasi Mendi i Monakos shkoi te Siti në vend të Çelsit. Ajo ndryshoi jetën e mbrojtësit të krahut, që ndaj Karabakut të Agollit shënoi një perlë të vërtetë, që kujtonte Shevçenkon në një Milan-Juventus… Dhe, në Ishullin Liri, stadium prej 3000 vendësh është ndoshta sa një lagje e vogël londineze, por sot Zapakosta kthen kokën mbrapa dhe mendon: ndoshta ëndrrat duhet t’I ndjekësh dhe të besosh në to!