Pas fitores së djeshme të Prishtinës, e ka pasur radhën Drita të zbresë sot në fushë dhe kundër Vllaznisë modeste ka bërë detyrën. Fitore e thjeshtë 2-0, me gola të shënuar që në pjesën e parë, një prej tyre nga ish-mesfushori i Laçit Drilon Musaj. Tashmë kreu është sërish pronë e Dritës, që ka 3 pikë më shumë se Prishtina në renditjen e Superligës së Kosovës.
Ndërkaq, ka festuar edhe Trepça ’89, e drejtuar nga Gugash Magani, që ka mposhtur 3-0 Vëllaznimin, me dy gola nga Oto Xhon dhe një gol nga Lladrovci. Gjithsesi, tashmë kampionët në fuqi janë jashtë gare për titull, me 10 pikë më pak se Drita.
