Sot në Zyrih të Zvicrës është hedhur shorti sa i përket kualifikueseve të Botërorit. Ky short është pritur me shumë kuriozitet nga ana e tifozëve shqiptarë, që kërkojnë të shkruajnë historinë për të shkuar njëherë në këtë kompeticion madhor. Megjithatë ndryshe nga çfarë mendohej, për të pasur fatin me vete si në kualifikueset e Europianit, këtë herë është një tmerr i vërtet.
Shqipëria ka gjetur në grup nga vazo e parë Anglinë. Kundërshtar më të vështirë se ky, me siguri që kuqezinjtë nuk mund të gjenin. Historia ka treguar se kuqezinjtë nuk kanë asnjë shans të vetëm kundër anglezëve për të hyrë në lojë dhe për t’ia bërë sado pak të vështirë zhvillimin e ndeshjes, e jo më për të diskutuar për rezultat që është i pamundur.
Anglia hyn mes atyre pak ekipeve që nuk i lë Shqipërisë asnjë shans për të ëndërruar mrekullinë dhe sot e gjejmë në grup për kualifikueset e Botërorit. Sikur të mos mjaftonte kjo, nga vazo e dytë kemi peshkuar Serbinë.
Kështu Shqipëria dhe Serbia do të jenë sërish në të njëjtin grup. E gjithë bota e futbollit po flet për derbin e Ballkanit, teksa menjëherë pas daljes së këtij grupi, të shumtë ishin postimet e njerëzve në rrjetet sociale të cilët shprehen se nuk mund të qëndrojnë dot për ta pritur këtë përballje dhe se do të jepnin gjithçka për ta parë që të ndodhi sa më shpejt.
Kurioziteti është i lartë për këtë ndeshje sidomos pas asaj që ndodhi në mbrëmjen e Beogradit, mesa duket do të kemi sërish një tjetër mbrëmje Beogradi. Ndërkohë nga vazo e katërt, na ka rënë Letonia. Një kundërshtar që pavarësisht se ka humbur shumë ndeshje, në kohët e fundit i ka bërë rivalët që të djersijnë shumë për të dalë me tre pikët. E parë në këtë prizëm, edhe ky rival nuk do të jetë aq i lehtë për t’i bërë kuqezinjtë që të ndihen komod në të paktën një ndeshje të vetme. Ndërkohë nga vazo e fundit, Shqipëria ka gjetur Andorrën si kundërshtar, për të plotësuar një grup i cili paralajmëron luftë të madhe. Në bazë të rregullave, vendi i parë i këtij grupi do të kalojë më tej në Botëror, ndërsa vendi i dytë do të shkojë në Play Off. Pra Shqipërisë i duhet të kalojë të paktën Serbinë për të kaluar më tej në Play Off. /Sport Ekspres/