Armand Duka ka reaguar pas humbjes së djeshme të Kombëtares sonë kundër Italisë me shifrat 2-1. Presidenti i FSHF-së ka kërkuar nga tifozët që të krenohen me ekipin tonë kombëtar. Përmes një shkrimi në llogarinë e tij në “Facebook”, Duka ka falenderuar tifozët, që sipas tij kishin një sjellje shembullore.
“Çdo ditë duhet të jemi krenarë me Kombëtaren! Futbolli është i bukur, të bën të ëndërrosh dhe të besosh që gjithmonë ke mundësinë të fitosh. Besuam se mund të merrnim rezultat pozitiv ndaj Italisë, por nuk ia dolëm.
Pavarësisht kësaj, të gjithë ne duhet të jemi krenarë për këtë skuadër, të gjithë duhet të jemi të lumtur që jemi pjesë e Euro 2024. Djemtë dhanë gjithçka në fushën e lojës, u përpoqën të reagojnë dhe besuan deri në fund.
Na duhet ta rikujtojmë që kjo skuadër është ajo që na solli në Europian dhe kjo skuadër do luftojë deri në fund për çdo pikë, pavarësisht kundërshtarëve të fortë. Le të kemi besim te këta djem, t’i mbështesim dhe të besojmë tek ata deri në fund.
Në Dortmund përjetuam emocione të papërshkrueshme. Në stadium, në rrugët e qytetit, shqiptarë nga e gjithë bota u bashkuan e treguan se jemi më europian se europianët dhe kjo na bën akoma më shumë krenarë. Falënderime pafund për tifozët tanë, që në Dortmund krijuan “murin” kuqezi në mbështetje të Kombëtares. Forca Shqiperi”, ka shkruar Armand Duka./Halit Delibashi-Sport ESkpres/