Xhixhi Bufon ishte ai që e dëshironte më shumë nga të gjithë një triumf të Juventusit në Champions League këtë sezon dhe ai që e meritonte më shumë, por sërish nuk qe e thënë. Një penallti kundër, në minutën e tretë shtesë, ia errësoi sytë dhe fjalët ndaj arbitrit Oliver ndoshta ishin të tepruara, edhe pse i tillë ishte edhe kartoni i kuq ndaj kapitenit legjendar të Juves.
Pas ndeshjes, duke folur për televizionin e Juventusit, Bufon dha sinjalin se ndoshta ka ardhur momenti të ndahet me futbollin e luajtur: “Nuk do të na e heqin buzëqeshjen, jam krenar që jam kapiten i kësaj skuadre dhe keqardhja më e madhe e tërheqjes nga futbolli është pikërisht ndarja me këta djem, por jeta vazhdon. Shpresoj që të kem transmetuar diçka dhe që ta shfrytëzojnë”.