Dijon Gallapeni ka ndërruar ekip. Mbrojtësi i majtë mbetet në kampionatin polak, por tashmë do të mbajë veshur fanellën e Visla Plokut dhe jo atë të Vidzev Lodzit. Një hap përpara në karrierë ky për lojtarin e përfëqësueses së Kosovës, teksa Visla e Plokut gjendet në vendin e dytë në renditje, vetëm 3 pikë larg kreut. Ishte vetë klubi polak ai që njoftoi transferimin e Gallapenit përmes kanaleve të veta zyrtare. Visla Ploku ka bërë me dije se mbrojtësi shqiptar do të luajë në huazim deri në fund të sezonit, por me të drejtë blerjeje për një shifër prej 700 mijë eurosh.
“Lojtari 21-vjeçar i kombëtares së Kosovës, Dion Gallapeni, i është bashkuar Visla Plokut nga Vidzev Lodzi në formë huazimi deri në fund të sezonit 2025/2026 me të drejtë blerjeje. I lindur më 22 dhjetor 2004, Gallapeni bëri hapat e parë në futboll me klubin vendas në Prizren, nga i cili u transferua te FC Prishtina. Ai luajti për herë të parë për ekipet e të rinjve, duke debutuar për ekipin e parë në vitin 2023. Pavarësisht moshës së tij të re, rekordi i tij për klubin nga kryeqyteti i Kosovës është 61 paraqitje, 5 gola dhe 10 asiste, nga të cilat 49, 2 dhe 8 janë në Ligën e Parë të Kosovës. Ndër arritjet e tij, vlen të përmendet kontributi i tij në fitimin e dy kupave vendase dhe Superkupës së Kosovës.
Verën e kaluar, mbrojtësi i krahut të majtë vendosi të largohej nga liga e tij e origjinës dhe u bashkua me Vidzev Lodzin si transferim i përhershëm. Këtë sezon, Dioni ka bërë 10 paraqitje dhe ka shënuar një gol në PKO Bank Polski Ekstraklasa, si dhe dy ndeshje në Kupën Polake STS. Interesante është se ai bëri paraqitjen e tij të parë të plotë në Poloni në raundin e 4-t kundër Visla Plock (1-1).
Për më tepër, në mars të vitit 2025, Dion Gallapeni debutoi në ekipin kombëtar të Kosovës, ku shpejt fitoi një vend në formacionin titullar të ekipit dhe aktualisht mund të krenohet me 9 paraqitje me fanellën e ekipit kombëtar. Mirë se vini në bord”, ka komunikuar klubi Visla Plok./Sport Ekspres/