Ka përfunduar në barazim 0-0 sfida mes Dinamos dhe Partizanit. Të dyja skuadrat largohen nga “Elbasan Arena” me nga një pikë të fituar. Të kuqtë kanë rrezikuar disa herë portën e Harizajt, por pa arritur të dërgojnë topin pas shpinës së tij.
Partizani e ka mbyllur ndeshjen me një lojtar më pak, teksa Murataj është larguar me karton të kuq pas një ndërhyrjeje të gabuar nga Siljanovskit. Megjithatë fati nuk është në krahun e Dinamos, pasi VAR-i ndërhyn dhe arbitri anullon vendimin e tij për penallti. Pas përfundimit të ndeshjes, trajnerët kanë dhënë intervistat e tyre për emisionin “Gol pas Goli“ në “Supersport“.
Mehmeti (Partizani): “Vazhdojmë të vuajmë pjesën e sinkronizimit dhe qetësisë para portës. Nxitohemi në mënyrën se si duam të gjejmë golin, kështu u treguam në 2-3 momente. Janë situata që duhet t’i zgjidhësh me qetësi dhe durim. Më pas lojtarët tregohen të paduruar për të shkuar te goli. Skuadra ishte e motivuar maksimalisht, por çdo ndeshje ka historinë e vetë. Nuk do të thotë se e ke të lehtë përballë një skuadre që e ke mundur më parë. Ka disa situata në lojë që drejtohen nga lojtarët. Te fitorja shkohet duke qenë i duruar. Nuk duhet të dalësh jashtë filozofisë tënde, fitorja vjen edhe në minutën e 90 apo të 95.
Nuk është aq e lehtë të sinkronizosh mënyrën e lojës së Kallakut. Jam munduar shumë që të jetë ai lojtari që na jep qetësinë dhe pasin e fundit në 20 metrat e fundit, por është e vështirë, pasi edhe Skuka ka nevojë për hapësira. Jam munduar që ta mësoj të bëjë kundërveprime dhe lëvizje të shumta, por është e vështirë“./Halit Delibashi-Sport Ekspres/