Champions League është turneu i spektaklit, por ashtu si në çdo ndeshje futbolli është e pamundur të evitohen disa episode të pakëndshme. Kjo ndodhi edhe në takimin ku Lioni fitoi 2-1 në mënyrë surprizë në fushën e Mançester Sitit. Në tribunat e “Etihad Stadium”, një tifoz i skuadrës franceze bëri përshëndetje naziste.
Ngjarja ishte e regjistruar në pamje video dhe menjëherë policia e qytetit të Mançesterit ka nisur hetimet për krim që lidhet me urrejtjen. Imazhet e përhapura edhe në mediat sociale janë dënuar gjërësisht, ndërsa edhe klubi i Ligue 1 paralajmëroi se do të marrë masa të ashpra.
Përfaqësuesit e Lionit njoftuan se, sapo tifozi të identifikohet, ata do t’a dënojnë përjetë, që të mos lejohet të hyjë në ndeshjet e ekipit. “Sapo të identifikohet, ai tifoz do të dënohet përjetë”, shkruajti klubi francez në një deklaratë zyrtare.
Nga ana tjetër, edhe policia e Mançesterit është vënë në lëvizje, për të zbuluar identitetin e tifozit të padëshiruar. Sipas inspektorit Garet Parkin “forcat e rendit janë të angazhuar që të evitojnë shfaqjet e racizmit nga futbolli” dhe për këtë ngjarje do të nisë bashkëpunimi i ngusht me policinë franceze dhe dy klubet, për të gjetur personin përgjegjës.