Në këtë Kupë Bote kemi parë gjithçka çfarë mund të shihnim, edhe pse jemi ende në gjysmë të rrugës dhe nuk ka mbaruar asgjë… Përdorimi i VAR-it, penalltitë rekord, surprizat e mëdha, eliminimet e mëdha, por edhe gola të bukur e disa të pamundur, pa harruar këtu edhe emocionet deri në sekondat e fundit…
Por, mes tyre, kemi parë edhe një futbollist që duhet të jetë lideri i Brazilit, por që deri tani ka qenë vetëm personifikimi i arrogancës. Bëhet fjalë për Nejmarin, ose ndryshe “O Ney”, siç e thërrasin. E ndërsa në Brazil i bëjnë mburojë, pjesa tjetër e botës, thuajse gjysma, e akuzon rëndë.
“Nejmar ka sensibilitetin më të ulët të dhimbjes në krahasim me çdo futbollist tjetër i Kupës së Botës që kur kanë nisur statistikat Opta”… Geri Lineker është vetëm një nga legjendat e futbollit që vë në lojë brazilianin, ndërsa rrotullimet e tij në fushë pas një faulli janë bërë virale në rrjetet sociale, aq sa tashmë çdo ditë po prodhohen video të ndryshme humoristike.
Dhe, thuajse të gjithë dalin në një konkluzion: “Është vetëm një karagjoz dhe palaço!”.
Nejmar duket sikur argëtohet duke i acaruar në atë formë, teksa Pele ende nuk është shprehur, por e sigurt është që i vjen disi keq, pasi pasardhësi i tij, “në thonjëza”, natyrisht, po bën krejt të kundërtën që ai ka bërë, kur tepër i ri, vetëm 17 vjeç, në Suedi, do të dëmtonte rëndë gjurin dhe do të zbriste në fushë me dhimbje, duke fituar si protagonist Botërorin në vitin 1958.