Shqiptaro-maqedonasi i mbrojtjes së Vllaznisë nuk do t’ia dijë për rivalët dhe premton ngritjen e skuadrës shkodrane në vendin që i takon
Gaspër Marku
Lojtari shqiptaro-maqedonas, Sedat Berisha, ishte caktuar nga klubi kuqeblu të dilte dje në konferencën e shtypit të organizuar para ndeshjes me Flamurtarin. Mbrojtësi ka bërë daljen e parë publike që kur ai është bërë pjesë e kuqebluve në merkaton e janarit. Kështu, përveç se ka folur për ndeshjen e sotme me Vllazninë, Berisha ka dhënë mendimin e tij për skuadrën ku bën pjesë, duke shprehur bindjen se Vllaznia do të qëndrojë në elitë. Mbrojtësi shtatlartë theksoi se skuadra duhet të shohë ndeshjet e saj dhe jo rivalët.
– Berisha, nesër (sot) përballja me Flamurtarin. Si është vlerësuar kjo ndeshje nga ana juaj?
– E vlerësojmë Flamurtarin, kemi respekt për lojën që bën, si dhe për pozicionin që ka në tabelë, por nesër (sot) shpresojmë për fitore.
– Ky është prononcimi i parë që kur keni nënshkruar për Vllazninë. Si ndjeheni me këtë skuadër?
– Po, kjo është intervista ime e parë për mediet e Shqipërisë. Në Shkodër gjendem si në shtëpinë time. Me kanë pritur shumë mirë drejtuesit e klubit, stafi teknik dhe lojtarët. Për këtë jam shumë i kënaqur.
– Çfarë ndryshimi vine re nga kampionati i maqedonas me këtë shqiptar?
– Kampionati i Maqedonisë është i një niveli më të ulët se i Shqipërisë. Mendoj se këtu është futbolli më interesant dhe më i mirë.
– Ka presion te Vllaznia përpara ndeshjes me Flamurtarin?
– Presioni bëhet nga ana e njerëzve, kurse ne në ekip nuk kemi. Jemi një ekip i shëndoshë, mendojmë që vetëm me punë të marrim rezultate pozitive.
– Mbrojtja është ndër repartet më të kritikuar te Vllaznia. Çfarë ndodhë në këtë repart?
– Në ndeshjet e para nuk e kemi njohur njëri-tjetrin mirë, por tash, duke filluar nga Lushnja, kemi avancuar pak më mirë. Në ndeshjen e Laçit ishte një faull kundër nesh dhe në tri ndeshje nuk kemi pësuar gol.
– Te Flamurtari gjeni trajnerin Duro dhe disa futbollistë, me të cilët keni luajtur te Shkëndija e Tetovës…
– Kam disa kolegë, që kam luajtur te Shkëndija, kurse me profesor Duron kam punuar 6 muaj. Kam respekt për të, por në fushë le të fitojë kush të jetë më i forti. Do të jap maksimumin, duke mos menduar për miqësinë.
– Sa ndikon rezultati i ndeshjes së Teutës në ndeshjen tuaj me Flamurtarin?
– Sa për Teutën, nuk na intereson aspak, na intereson vetëm Vllaznia. Na intereson Vllazninë, sepse duhet ta ngremë nga ky vend ku është. Nuk e meriton këtë pozicion. Besojmë 100% në fitoren tonë në ndeshjen me Flamurtarin. Në çdo ndeshje mendojmë vetëm për fitore.
– Me sa është parë, do të keni Pjeshkën në krah, në vend të Malotës të skualifikuar. Si e prisni këtë bashkëpunim?
– Besoj se kushdo që të futet në 11-shin e parë, do të japë maksimumin dhe do të luajë me shpirt në fushë.