Në Angli është mbyllur me sukses një operacion për kapjen e një rrjeti shpërndarësish kokaine, thuajse të gjithë nga Shqipëria. Grupi vepronte në Londër dhe janë arrestuar disa persona, të cilët transportonin kokainën duke e fshehur në makinat e tyre, ndërkohë që 8 persona, nga të cilët 7 shqiptarë, janë arrestuar dhe dënuar me 43 vite burg në total.
Gjatë operacionit, u kap kokainë me vlerë thuajse 1 milion sterlina, si dhe u konfiskuan shumë të konsiderueshme parash.
Një ndër personat e dënuar është edhe një ish-futbollist, Valon Bajgora. Ish-mesfushori nga Kosova ka luajtur në Shqipëri në sezonin 2006/2007, kur veshi fanellën e Besës për disa muaj. Bajgora ka luajtur edhe për disa klube të tjerë në Kosovë, por duket se ka zgjedhur një mënyrë tjetër pasurimi, më të shpejtë dhe më të rrezikshme. Bajgora pranoi akuzat dhe kërkoi ulje dënimi, duke u dënuar me 2.8 vite burg.
