Atalanta nuk është për t’u marrë shembull vetëm në aspektin e mënyrës sesi paraqitet në fushën e lojës duke dhuruar spektakël me lojën e saj, por edhe për financat dhe mënyrën e menaxhimit. Ekipi nga Bergamo është vërtet shumë i kujdesshëm në merkaton që bënë, duke shitur lojtarë që kërkohen nga skuadrat më të mira në Itali, por që për vetë peshën e klubit nuk janë…asgjë!
Në këtë mënyrë kryevepra Atalanta duhet studiuar edhe në universitet për mënyrën sesi mund të ngrihet një biznes në majat më të larta. I tillë është futbolli sot, ndërsa skuadra ku aktivizohet edhe Berat Gjimshiti ka fituar 322 milionë euro në fitime kapitale në 4 vitet e ngritjes.
Largime të goditura që nuk dëmtojnë dhe cënojnë ekipin, por që e mbushin mirë arkën. Është pikërisht kjo mënyra sesi është proceduar, e bashkangjitur kjo edhe me besimin e madh te trajneri Gasperini që mbetet i palëvizshëm, duke thyer çdo parashikim rreth suksesit të arritur nga Atalanta. /Sport Ekspres/