Në datën 10 janar në fushën e “Air Albania” do të zbresin yjet historikë të Kombëtareve të Shqipërisë, Turqisë, Italisë dhe Greqisë. Lojtarë që fituan Botërorin 2006 me Italinë, fituesit e Europianit 2004 me Greqinë, futbollistë që përjetuan arritje të mëdha me Turqinë në Botërorin 2002 si dhe emra të historisë së kuqezinjve do të bëhen të gjithë bashkë në një ndeshje miqësore në stadiumin më të ri të Shqipërisë. E gjithë kjo me arsyen e bamirësisë, teksa të gjitha të ardhurat do të shkojnë për familjet e prekura nga tërmeti i fuqishëm i 26 nëntorit.
Ndërkohë përpara takimit nuk do të mungojnë as performance artistike nga figura të njohura të muzikës sonë. Lajmi vjen nga FSHF-ja që fton të gjithë të jenë të pranishëm në shkallët e stadiumit dhe të japin kështu kontributin e tyre në lehtësimin sadopak të familjeve të prekura nga tërmeti. Gjithashtu Federata Shqiptare e Futbollit ka shprehur vullnetin e vetë për të ndërtuar të paktën 3 shtëpi të shkatërruara nga tërmeti i një muaji më parë, evidentimi i të cilave ka nisur./Sport Ekspres/
Njoftimi i plotë:
Yjet historikë të kombëtareve të Shqipërisë, Italisë, Greqisë dhe Turqisë do të zbresin në fushën e Air Albania Stadium në datë 10 janar. Ky festival i futbollit me emrat e njohur të katër kombëtarëve, siç janë Zambrota e Perrota, Kampionë të Botës në 2006, apo Hasan ?a? i cili ishte një nga liderat e Turqisë në Botërorin e vitit 2002 ku u renditën në vendin e tretë si dhe fqinjët grekë të cilin fituan Kampionatin Europian në vitin 2004 nën dirigjimin e Karagunis, synon krijimin e një tradite të tillë në futbollin shqiptar për të afruar sportadëshit me emrat e mëdhenj të futbollit tone dhe atij ndërkombëtar. Të gjithë të ardhurat e siguruara nga shitja e biletave të ndeshjes do të shkojnë për familjet e prekura nga tërmeti i 26 Nëntorit. Ky turne organizohet nga Sindikata e Futbollit me mbështetjen e plotë të Federatës Shqiptare të Futbollit.
Federata e Futbollit dhe Sindikata e Futbollistëve, fton të gjithë sportdashësit në këtë festival të paharrueshëm, ku do të performojnë në fushën e blertë emra të dashur, historikë dhe kampionë të futbollit, pa harruar edhe performancën artistike të emrave të mëdhenj të muzikës shqiptare. Le të bashkohemi në këtë turne për të dhënë sadopak ndihmesë për të prekurit. Ky projekt i përgjegjësisë sociale, vjen në vazhdën e aktiviteteve të pandërprera të Federatës së Futbollit, të stafit dhe djemve e vajzave të kombëtareve shqiptare për të ndihmuar dhe lehtësuar familjet e prekura nga tërmeti. Fokusi parësor ka qenë te fëmijët.
Federata e Fubollit është zotuar të ndërtojë të paktën tre shtëpi të rrënuara nga tërmeti, ose më shumë në varësi të fondeve të mbledhura. Ka nisur tashmë evidentimi i shtëpive.