Ndeshja mes Skënderbeut dhe Dinamos ishte një duel direkt mes dy trajnerëve Memelli dhe Shkëmbi. Ashtu si edhe pritej, ishte si një finale ku të dy ekipet do të bënin gjithçka për të mos humbur. Pjesa e parë u mbyll pa shumë mundësi të pastra, ndërsa e dyta nisi vrullshëm.
Në minutën e 55 do të ishte Siljanovski që dhuroi një perlën nga distanca. Pasi u festua për rreth 1 minutë për golin e avantazhit dhe po përgatitej zëvendësimi te Skënderbeu, arbitri akordon pozicionin jashtë loje me ndihmë të VAR. Pamjet i dhanë të drejtë pasi aksioni niste me Ibrahimin që ndodhej në pozicionin jashtë loje.
Gjatë minutave të fundit korçarët kanë kërkuar edhe një penallti që nuk është menduar në të njëjtën mënyrë nga kryesori i takimit. Por pika kulmore ishin sekondat e fundit. Dinamo ishte hedhur e gjitha në sulm, madje edhe Sofranac shkoi për të marrë detyrën e sulmuesit. Kaq mjaftoi dhe Nikaj do ta kishte më të lehtë kundërsulmin duke marrë “zvarrë” dy lojtarë të Dinamos dhe e nxori Mensah, të vetëm përballë Simonit.
Sulmuesi ka bërë të pamundurën për të humbur rastin dhe Simoni nga ana tjetër rikonfirmohet si heroi i Dinamos. Memelli shtrihet për tokë dhe nuk mund ta besojë sesi Mensah gaboi dhe nuk i dhuroi fitoren. Më poshtë gjeni intervistat e trajnerëve për “Supersport”:
Simoni: “Jam shumë i gëzuar që po marrë minuta në Superiore. Shpresoj që të më eci mbarë, kështu si po shkon. Të gjithë djemtë më kanë komplimentuar. Kam moshë të vogël, por në fakt nuk është se kam presion apo emocione kur hyjë në fushë, thjesht mundohem që të argëtohem. Modeli im? Mundohem që ta kopjoj Oblak. Jam tifoz i Real Madrid dhe uroj që një ditë të shkojë në këtë ekip”
Shkëmbi: “Lojtarët u munduan, u përpoqën dhe bënë gjithçka sot. E kishim ne lojën në kontroll, por të jem i sinqertë që ishte edhe fat që morëm një pikë me atë rast të Mensah. Jemi të gjithë të zhgënjyer te Dinamo, e kishim menduar ndryshe, por ky është futbolli. Ky është momenti i duhur për të reflektuar dhe për të bërë një analizë të thellë. Kemi sulmues që nuk kanë shënuar një gol, nuk është për t’u fshehur, por nuk është aty ku duhet”.
Memelli: “Ishin momentet e fundit dhe ajo që parashikova në këtë ndeshje ishte kundërshtari i fortë që kishim përballë dhe se do të kishim shanset tona. Janë gjëra që ndodhin. Nëse do të isha unë në vendin e Mensah si lojtar, nuk ndodhte që topi të shkonte jashtë, do të ndalej vetëm në rrjetë. Kjo ndeshje që kemi bërë sot ishte dhurata më e bukur që i kemi brë familjeve tona. Mensah është vetëm 20 vjec, është episod që duhet kaluar pa problem pasi na ka ndihmuar më parë. Ne si ekip na pëlqen të vuajmë”