Në një moment kur Flamurtari ndodhet në momentin më të vështirë të viteve të fundit, Luan Birçe qendron aty për të dhënë kontributin e tij, pavarësisht se nuk mund të ndryshojë situatën. Këtë mund ta bëj vetëm një shkop magjik, që askush prej trajnerëve nuk e zotëron.
Por atë që Birçe e ka në zotërimin e tij, po e jep për Flamurtarin. Flasim për besnikërinë e madhe dhe dashurinë që i ofron skuadrës, pavarësisht momenteve të vështira. Trajneri në fjalë mungoi në stërvitjen e së hënës për ndeshjen me Tiranën dhe në media u përfol largimi i tij.
Megjithatë kishin ngatërruar adresë, pasi gjithëkush mund ta braktiste Flamurtarin në këtë moment, por jo Birçe. Kjo edhe pasi vetëm para pak ditësh u shpreh se një faj të madh për këtë gjendje të vlonjatëve kanë edhe lojtarët e larguar, që tregojnë munges respekti duke ikur para kohe. E pas këtyre fjalëve, nuk mund të tërhiqej edhe vetë në këtë moment.
E gjitha kjo tregon personalitetin e Birçes që mbetet për t’u duartrokitur. Të paktën edhe për mbylljen e këtij viti do të jetë trajner i Flamurtarit, ndërsa nga janari, të gjithë janë me sytë nga presidenca. /Sport Ekspres/