Florian Kamberi ka rrëfyer për mediat skoceze grumbullimin e parë me kuqezinjtë e Shqiërisë. Sulmuesi shqiptar është ndalur te ai problem që ndodhi sa i përket dokumentacionit që duhej të ishte gati nga Federata e Zvicrës. Fatkeqësisht helvetët nuk e dhanë dritën e tyre jeshile në kohën e duhur, çfarë i mohoi Kamberit edhe debutimin me Kombëtaren shqiptare. Futbollisti shprehet se kjo gjë e ka mërzitur së tepërmi, ndërsa tashmë duhet të presë vitin e ardhshëm për të zbritur në fushë për herë të parë me fanellën kuqezi.
“Isha shumë i gëzuar që mora ftesën e Shqipërisë pikë së pari. Shkova atje, u stërvita dy ditët e para, më pas pata probleme me kyçin. Pastaj zbulova se dokumentet nga Zvicra nuk ishin gati. Supozohej që unë të isha titullar ndaj Andorrës dhe të luaja një pjesë me Francën. Mendoj se Zvicra duhej të dërgonte disa dokumente dhe nuk e bëri këtë gjë, sepse njerëzit përgjegjës ishin larguar me ekipin Kombëtar. Nuk e di saktësisht se cili ishte problem. Thjesht dija që dokumentet nuk ishin gati. Kjo ishte e mërzitshme, por gjithsesi jeta vazhdon. Isha paksa i zhgënjyer. Por të paktën isha atje, i takova të gjithë dhe kalova një javë të mirë, edhe pseu ktheva më herët për shkak të dëmtimit. Por të paktën nuk ishte faji im. Unë bëra gjithçka nga ana ime për të qenë gati. Thjesht duhet të jem i duruar. Tani jam kthyer te Hibernian, do të bëj më të mirën time këtu dhe të shpresoj të rikthehem vitin tjetër.
Porrini erdhi në ndeshjen kundër Celtik. Më pa duke luajtur dhe ditën tjetër u takuam së bashku me agjentin dhe babain tim. Patëm një bisedë të mirë, ata e bënë të qartë se më donin vërtet, pasi duan të ndërtojnë një skuadër të re dhe të kenë një epokë të re. Unë dua të jem një pjesë e rëndësishme e saj. Të kem Porrinin atje, që ka luajtur më parë me Rangers, është diçka e mirë, pasi disa njerëz mendojnë se të luash në Skoci është e lehtë, por nuk është ashtu, është shumë e vështirë. Të luash futboll me Kombëtaren është një motivim dhe nëse e ke një mundësi të tillë është një privilegj për çdo lojtar. Unë jam gjithnjë i motivuar të jap më të mirën time dhe më terër se aq në mënyrë që të luaj me Kombëtaren”, ka thënë Florian Kamberi./Sport Ekspres/