Nëse Milani ka arritur në gjysmëfinalen e Champions League, merita më e madhe i përket Leaos, emri i plotë i të cilit është Rafael Alessandre Conceisao Leao. Ai ka lindur 23 vjet më parë në Almada, periferi e Setúbal, si një fëmijë emigrantësh nga Afrika. Babai i tij është nga Angola dhe nëna e tij është nga Sao Tome dhe Principe. Ata u takuan në Portugali, u dashuruan dhe krijuan një familje. Leao ka tre vëllezër dhe tre motra.
Babai i tij ishte punëtor krahu dhe nëna ishte parukiere, me dashurinë e madhe që u kurorëzua me lindjen e fëmijëve, mes të cilëve ishte edhe Leao. Prindërit e quajtën Leao, që do të thotë Luan në portugalisht, sepse e shihnin si të patrembur. Edhe sot prindërit e tij punojnë, edhe pse djali i tyre është milioner. Gjëja e parë që bëri Leao kur mori një rrogë të madhe si futbollist ishte ndërtimi i një shtëpie të re familjare për prindërit e tij. Më pas ai hapi një parukeri moderne për nënën e tij dhe ishte klienti i saj i parë.
Leao ka një marrëveshje me të atin, me të cilin është shumë i lidhur, që të flasin me njëri-tjetrin pas çdo ndeshjeje dhe këtë nuk e ka shkelur kurrë. Futbolli ishte gjithmonë më i rëndësishëm për të sesa shkolla, për këtë arsye ka kryer shkollën e rregullt fillore dhe të mesmen me kohë të pjesshme. /Sport Ekspres/