Shqipëria vijon që të stërvitej në Zvicër për të përgatitur edhe miqësoren e dytë dhe të fundit përpara se gjithçka të hyjë në fazën e seriozitetit dhe ndeshjeve me vlerë, në shtator dhe tetor. Në konferencën për shtyp u paraqitën Berat Gjimshiti dhe Frederik Veseli. i pari e mori fjalën mbrojtësi i Beneventos, që ka rënë në kategorinë e dytë, por që do të kthehet te Atalanta. Pyetjes për humbjen ndaj Kosovës, ai iu përgjigj: “Me Kosovën ishte ndeshje e dobët si ajo me Luksemburgun, mendoj se gjithmonë mund të reagojmë,besoj se para startit të Nations League mund të provohen disa lojtarë për të treguar vlerat e tyre. Çdo trajner ka mënyrat e veta për të punuar, tani duhet të lëmë pas Kosovën dhe të bëjmë më shumë me Ukrainën, ka rëndësi të përmirësohemi dhe të reagojmë për gabimet që kemi bërë dhe për tifozët. Ne jemi profesionistë dhe jemi të hapur çdo gjë”. Por, a do të ketë një reagim? Sipas Gjimshitit “të gjithë lojtarët duan të reagojnë pas figurës së keqe me Kosovën. Për momentin nuk kam folur me asnjë. Jam në grumbullim me kombëtaren dhe pastaj do të mendoj për pushimet. Pas pushimeve do të flas me menaxherin tim dhe do të vendosim. Kam dhe një vit kontratë me Atalantën. Në Itali ndihem mirë do më pëlqente të vazhdoja të luaja në Serinë A, por unë jam i hapur ndaj çdo oferte dhe mendoj se do të përshtatesha edhe në një kampionat tjetër”, u shpreh Gjimshiti.
Veseli – Më pas, fjalën e mori edhe Veseli, që gjithashtu ka komentuar sfidën ndaj Kosovës dhe duke justifikuar faktin se mbrojtja ishte ajo që “futi ujë”. “Nuk ishte vetëm mbrojtja në ditë të keqe në ndeshjen miqësore me Kosovën. Ishte i gjithë ekipi që luajti keq atë ditë. Kuptohet që është fundi i sezonit dhe ndoshta edhe lodhja bën të vetën, por në Kombëtare të gjithë vijnë me dëshirë për të dhënë maksimumin. Nuk është se ishte përgatitur keq ndeshja e fundit. Duhet të marrim të gjithë përgjegjësitë tona për atë ndeshje, që duhet harruar sa më shpejt dhe kemi rastin ta bëjmë në miqësoren me Ukrainën”. Sakaq, mbi diskutimet me trajnerin përpara stërvitjes, mes tensionit. “Diskutimet me trajnerin para stërvitjes? Ai gjithmonë në mbledh para seancave stërvitore dhe na tregon për situata të ndryshe në stërvitje dhe në ndeshje. Nuk ka diçka të jashtëzakonshme në këtë rast. Ka pasur gabime në ndeshjen e fundit, por është me rëndësi të reagojmë në vazhdim” u shpreh lojtari i Empolit.