Filipe Kutinjo shpëtoi Brazilin nga një situatë stresuese, duke shënuar golin e fitores në minutën e 91t-të, para se Nejmar të vuloste suksesin 2-0 ndaj Kosta Rikës në minutën e 97-të. Ish-ylli i Liverpulit ishte heroi i ditës, ashtu si në ndeshjen e parë në grup, ku goli fantastik ndaj Zvicrës nuk u mbrojt dot deri në fund.
Megjithatë, ishte një tjetër paraqitje jo e mirë e favoritëve të Botërorit, sepse Kosta Rika fare mirë mund ta kishte marrë një pikë dhe që në fillim humbi një rast të artë për gol. Brazili u zgjua në fund të pjesës së parë dhe dominoi në pjesën e dytë, por duket qartë që ka probleme me skuadrat që mbyllen në mbrojtje.
Nejmar ishte sërish zhgënjyes, këtë radhë edhe acarues, me një simulim të shëmtuar (Ja pse duhet VAR).
Ja 5 gjëra që mësuam nga kjo ndeshje, shkruan Mirror:
- Brazili nuk ka vrull në start.
Brazili e nisi mirë ndaj Zvicrës, shënoi me Filipe Kutinjon një gol fantastik dhe pastaj e uli komplet ritmin, duke pësuar golin e barazimit. Në Shën Petersburg brazilianët e nisën ngadalë, krijuan pak gjatë pjesës së parë dhe me vuajtje shënuan në pjesën e dytë.
Tite duhet të gjejë mënyrën që Brazili të jetë më agresiv që në fillim dhe të krijojë lojë e raste në mënyrë konstante.
- Nejmar nuk po bën diferencën
Nuk u duk në formë perfekte fizike kundër Zvicrës, nuk është stërvitur rregullisht këtë javë dhe nuk ishte vendimtar as ndaj Kosta Rikës, duke vuajtur shumë mbulimin e saktë të Gamboas, lojtar që nuk luan futboll prej muajit shkurt.
I ngadaltë në lëvizjet e tij, Nejmari shënoi në shtesë, por ishte gol pa ndonjë vlerë për bilancin e ndeshjes. Kështu, Nejmar ta harrojë Topin e Artë.
- Sa kushton ky Uillian?
Në një futboll të çmendur, ku sheikët dhe pronarët miliarderë paguajnë shifra jashtë realitetit, është e vështirë të kuptosh nëse një futbollist vlen aq sa është paguar. Uillian, tashmë 29 vjeç, është një zgjedhje e dytë te Çelsi dhe Junajtid e kërkon për 60 milionë sterlina, por a ia vlen?
- Sikur Ruiz të ishte më i shpejtë…
Brajan Ruiz është një ndër lojtarët më teknikë në Kupën e Botës, por për fatin e tij të keq nuk ka qenë kurrë i shpejtë. Tani kapiteni i Kosta Rikës është 32 vjeç dhe vazhdon të udhëheqë me mjeshtëri ekipin e tij, duke dirigjuar lojën, por nuk është se ka yje përreth.
- VAR shpëton arbitrin Kuipers
VAR nuk duhet në futboll? Shkoni dhe thojani holandezit Bjorn Kuipers, i cili meriton duartrokitje për faktin se vendosi të bënte një hap pas dhe të anulonte penalltinë dhënë Nejmarit, pas kontrollit të pamjeve filmike. Në momentin e parë u duk penallti neto, Kuipers nuk pati faj, por pa VAR do kishte marrë vendimin që do shkaktonte 1000 polemika.