Sezoni i ri i futbollit shqiptar ka nisur ditën e sotme. Pas atij bojkoti që zgjati mbi 1 muaj e gjysmë ekipet kanë shkelur sërish barin e stadiumeve për të luajtur raundin e parë të Kupës së Shqipërisë. Megjithëse pandemia nuk është larguar ende dhe ndeshjet vijojnë të luhen me dyer të mbyllura, kjo nuk i ka ndalur tifozët që pas një pritjeje të gjatë të mbështesin nga afër skuadrën e zemrës.
Kështu Partizani i Ilir Dajës ka pasur një motiv shtesë në fitoren e sotme, ku kanë mposhtur thellë me shifrat 5-0 Ilirinë. As Covid-19 e as kilometrat nuk i kanë ndalur “Guerrilsat”, që ditën e sotme kanë qenë në Librazhd pranë stadiumit për të brohoritur suksesin e ekipit të zemrës./Halit Delibashi-Sport Ekspres/
