LIVE, Partizani-Tirana 2-0 Mba 20′, Cara 80′
Kryeqyteti sot vishet i kuq. Derbi i zjarrtë përfundon me fitoren e Partizanit. “Demat e kuq” kanë mposhtur me shifrat 2-0 Tiranën në “Air Albania”, ku spektator i veçantë ishte edhe trajneri i Kombëtares shqiptare, Silvinjo. Goli i parë u shënua nga Mba në minutën e 20, i cili zhbllokoi ndeshjen me kokë pas një krosimi të Hadrojit. Tirana përpiqet të reagojë gjatë pjesës së parë, por VAR-i i mohon një penallti që mund të ndryshonte rrjedhën e ndeshjes. Hasani tund rrjetën në pjesën e dytë, por anësore ngre lart flamurin, duke sinjalizuar pozicion jashtë loje.
Kur të gjithë prisnin golin nga bardheblutë, Rrapaj fiton një penallti në zonën e rreptësisë. Telushi shkon të godasë nga 11 metrat, por përballë ka një Visar Bekaj të vëmendshëm, i cili pret gjuajtjen dhe mban ende në lojë Tiranën. Në fund ishte Cara ai që vulosi fatin e këtij takimi. I sapo futur në fushën e lojës, Cara përfiton nga një pasim i gabuar i Behiratçes për Bekajn dhe me thembër e dërgon topin në rrjetë. Partizani merr tre pikë mjaft të vlefshme, të cilat e dërgojnë përsëri në krye të renditjes me pikë të barabarta me Tiranën./Halit Delibashi-Sport Ekspres/
Partizani do të përballet me Tiranën në orën 19:00. Stadiumi ka filluar të mbushet në Air Albania dhe pritet që tifozët të dhurojnë spektakël. Pak më parë janë publikuar edhe formacionet zyrtare. Trajneri Kolela ka vendosur Rexhepin para Alban Hoxhës, ndërsa Shehi vjen me vendosjen 3-5-2.
PARTIZANI (4-3-3): Rexhepi, Atanaskoski, Telushi, Sota, Hadroj, Matondo, Murataj, Rrapaj, Maguette, Da Silva, Mba
TIRANA: (3-5-2): Bekaj, Përgjoni, Najdovski, Behiratche, Lulaj, Haxhiu, Aleksi, Lushkja, Deliu, Hasani, Patrick