Daja: E kemi mbajtur Skënderbeun të pastër, kundër Vllaznisë me disa të rinj

Trajneri i Skënderbeut, Ilir Daja, është në një pozitë të vështirë, sepse duhet të mbajë ekipin të përqendruar deri në finalen e Kupës, por ndërkohë duhet të durojë edhe akuzat, sepse Skënderbeu i javëve të fundit është kthyer në Dinamon e fillimit të kësaj dekade, duke hapur portën ndaj rivalëve që kanë nevojë për pikë.

Sipas Dajës, e gjitha lidhet me motivimin e paktë, si dhe me rotacionin masiv për shkak të lodhjes së titullarëve: “Nuk luajmë për Vllazninë dhe asnjë ekip tjetër. Kemi politikat tona dhe po ju them se nëse do ta kishim mbyllur kampionatin që me Kukësin, po e njëjta gjë do të kishte ndodhur. Do t’u kishim dhënë minutazh lojtarëve me pak minuta në këmbë gjatë kampionatit, por edhe të rinjve të ardhur nga U-19.

“Ekipi nuk mendon më për rezultatin, sepse kampionati është mbyllur. Motivimi nuk është maksimal. Nuk i kërkohet rezultat një ekipi që riformatohet që nga porta e deri te sulmi. Në Gjirokastër luajti Soue për të mos i hequr të drejtën të finalizojë atë që ka bërë gjatë gjithë kampionatit. Ai u dëmtua me Luftëtarin dhe nuk kemi bërë asgjë kundër një futbolli fair-play. Skënderbeu nuk u përket vetëm titullarëve, por edhe të rinjve. E kemi mbajtur Skënderbeun pastër, natyrisht me një politikë në favorin tonë.

“Mund të kishim marrë më shumë lojtarë nga të rinjtë, por U-19 kishte një objektiv. Tani nuk ka dhe do të përdoren edhe nesër me Vllazninë disa të rinj, përveç Pëllumbit, që është grumbulluar me U-19-ën”.