Bernard Berisha nuk do të jetë më lojtari i Dinamos. Futbollisti ka njoftuar përmes një postimi në llogarinë e tij zyrtare në “Facebook” se ka ndërprerë marrëveshjen e tij me klubin kryeqytetas. Ai ka falenderuar drejtuesit, stafin, shokët e skuadrës dhe tifozët për mbështjetjen që i kanë dhënë gjatë kësaj kohe. Berish ka bërë me dije se së shpejti do të transferohet në një skuadër të re, por pa zbuluar emra.
“Pas marrëveshjes me klubin Dinamo, nga sot jam lojtar i lirë. Dua të shpreh mirënjohjen time të sinqertë për Presidentin e klubit, stafin, bashkëlojtarët dhe të gjithë tifozët e Dinamos për mbështetjen dhe respektin gjatë kësaj periudhe. Ishte një nder të isha pjesë e këtij klubi dhe ju jam falënderues për çdo moment të përbashkët.
I uroj Dinamos shumë suksese në vazhdim, si në kampionat ashtu edhe në çdo sfidë që e pret në të ardhmen. Ndërsa për mua fillon një kapitull i ri. Shumë shpejt do t’ju njoftoj edhe me skuadrën time të ardhshme. Faleminderit për gjithçka”, ka njoftuar Bernard Berisha./Sport Ekspres/