Ernest Muçi ka dhënë së fundmi një intervistë të gjatë në faqen zyrtare të Legias së Varshavës. Lojtari shqiptar ka folur për shumëçka gjatë bisedës së tij me Mateus Okrazevskin. Sulmuesi i talentuar ka ndarë momentet e tij më të bukura me fanellën e Legias, ndryshimet mes futbollit shqiptar dhe atij polak, si dhe ka zbuluar objektivin që i ka vendosur vetes për gjysmën e dytë të sezonit.
Objektivi për pjesën e mbetur të sezonit: “Para së gjithash, dua të ndihmoj ekipin. Kjo është më e rëndësishmja. Ne jemi të fortë si një. Kështu mund të kemi sukses. Mendoj se kemi lojtarë të mëdhenj dhe kushte të shkëlqyera për të pasur sukses. Personalisht, do të doja për të shtuar disa gola dhe asistime. Dëshiroj që raundi pranveror të jetë një moment i rëndësishëm dhe i paharrueshëm për mua”.
Të qenurit i thjeshtë dhe i përulur: “Mundohem të jem i përulur dhe modest sa më shumë që të jetë e mundur. Natyrisht, kur egoja juaj është shumë e lartë dhe nuk ka aftësi pas saj, nuk është mirë për ju dhe ekipin. Megjithatë, funksionon e njëjta gjë anasjelltas. Nuk mund të jesh shumë modest dhe i përulur. Duhet të jeni gjithmonë të vetëdijshëm për cilësinë që prezantoni. Në futboll shoh sjellje që mua personalisht nuk më pëlqejnë. E di që shumë lojtarëve u pëlqen të flasin shumë për veten e tyre. Dua të flas për veten time në gjuhën e futbollit, përmes stërvitjeve dhe ndeshjeve“.
Ndjesitë që ka te Legia: “Te Legia ndjeva menjëherë se mund të arrija më shumë se në Tiranë. Kam fituar ligën me ekipin tim të mëparshëm. Në atë kohë ndjeja se po luaja për ekipin më të mirë të vendit. Doja të bëja hapin tjetër. Tani ndihem njësoj sepse jam në klubin më të mirë në Poloni. Unë arrita në një ligë më të mirë, në një ekip më të mirë dhe tani jam shumë krenar që përfaqësoj Legian“.
Ndryshimet mes futbollit në Poloni dhe në Shqipëri: “Dallimi mes këtyre ligave shihet, ndër të tjera, në cilësinë e lojtarëve. Ka shumë më shumë lojtarë në ligën polake që mund të bëjnë diferencën në një fraksion sekonde dhe të vendosin për fatin e ndeshjes. Kur u bashkova me Legian, menjëherë vura re një përmirësim në cilësinë e stërvitjes. Më duhej të tregoja diçka shtesë që të bija në sy, në mënyrë që trajneri të më vinte re. Polonia është një vend më i madh se Shqipëria. Futbolli është jashtëzakonisht popullor këtu. Vura re shpejt se si njerëzit në vendin tuaj e duan futbollin. Është bukur të jesh i rrethuar nga njerëz që e duan futbollin po aq sa ti. Ishte një eksperiencë e madhe“.
Momentet më të bukura: “Mendoj se sezoni i kaluar, kur luajtëm në Europa League, ishte i mrekullueshëm për të gjithë ne. Ne konkurruam kundër Leicesterit, Napolit. Vetë më kujtohet, për shembull, ndeshja jashtë fushe kundër Napolit. Shumë djem të rinj ëndërrojnë të luajnë kundër rivalëve të tillë. E mbaj mend shumë mirë edhe debutimin tim në ekipin e parë. Këto janë dy momente që do të qëndrojnë me mua përgjithmonë. Sigurisht që më bëri të ndihem më i sigurt”, është shprehur Ernest Muçi./Sport Ekspres/