Sulmuesi po kalonte kulmin e karrierës së tij, pasi po zhvillonte sezonin më të mirë me Nantën, të cilët vendosën ta shisnin te Kardifi në Premier League. Plot 17 milionë euro, një shifër rekord për klubin francez, ndërkohë që edhe Sala do të përfitonte shumë më shumë në Kardif.

Gjithsesi, argjentinasi me sa duket nuk e ka dashur një transferim të tillë. Këtë gjë e zbulon “L’Equipe”, që ka nxjerrë një mesazh zanor që vetë Sala i dërgonte një miku të tij në “Whats App”.

Sulmuesi dëgjohet të thotë që nuk e do kalimin te Kardifi, pasi nuk përputhet me pritshmëritë e tij, duke nënkuptuar që kërkon kalimin në një klub më të madh. Gjithashtu, ai shton se po detyrohet të kalojë atje dhe se kjo gjë nuk po i pëlqen.

Le documentaire « Emiliano Sala, les secrets d’un destin brisé » a révélé un message vocal de l’attaquant argentin à ses proches le 6 janvier. Il y exprime sa rancoeur envers Waldemar Kita, le président du FC Nantes #lequipeENQUETE pic.twitter.com/RCqIMcwOLv

— L’ÉQUIPE (@lequipe) May 22, 2019

“Mbrëmë fola me agjentin tim Meisa, më tha që Frank Kita, i biri i presidentit Valdemar Kita, i kishte thënë se duan të më shesin.

Kanë marrë një ofertë nga Kardif. Për vete kanë vendosur një çmim të lartë dhe Kardif ka pranuar, ndaj duan që unë të shkoj patjetër atje.

Është e vërtetë që është kontratë e mirë, por në aspektin sportiv nuk është interesante për mua. Gjithsesi, ata duan që unë të shkoj me çdo kusht.

Personalisht, nuk kam frikë të shkoj atje, jam mësuar me beteja gjithë jetën time. Megjithatë, shpresoj që Meisa të më gjejë diçka më të mirë deri në mbyllje të merkatos së janarit.

Edhe Meisa nuk do që unë të shkoj në Kardif dhe mendon se jemi në një pozicion superior, mund të vendosim vetë ku duam të shkojmë. Nuk më plas shumë për këtë gjë, por do doja që të gjeja një klub të mirë dhe një kontratë të mirë. Në futboll rrallë bëhen bashkë të dyja këto.

Nuk dua të flas, as ta shoh Kitan, sepse acarohem. Ai do që unë të shkoj në Kardif, do paratë e tij, ndërkohë që as më ka pyetur fare çfarë dua unë. Është e vështirë, shumë, sepse më duhet çdo ditë të shoh surratin e atij personi, por askush nuk më sheh mua, çfarë kam unë në zemër”.

Fati ndonjëherë tregohet brutal. Argjentinasi sot mund të ishte gjallë, duke luajtur futboll në… Serie A! Siç raporton “L’Equipe”, Lacio, Udineze dhe Sampdoria kërkonin shërbimet e tij verën e kaluar.

Tentoi edhe Gallatasaraj, por turqit ndryshuan skemë në fund dhe kërkuan huazim me të drejtë blerje. Raporti i lojtarit me presidentin francez, Valdemar Kita nuk ishte aspak pozitiv. Ky i fundit ishte i qartë me klubet italiane: dëshironte 12 milionë euro dhe 20% të kartonit në rast të një shitje në të ardhmen.

Tare me shokë nuk pranuan, ndërsa Kita nuk toleronte aspak nga kërkesat e tij. Vera kaloi dhe Sala mbeti sërish në Ligue 1. Ai kërkoi edhe një rritje rroge, e cila nuk ndodhi kurrë. Raportet me presidentin u krisën.

Kita e kishte ndarë mendjen. Do e shiste Salanë në ofertën më të mirë që do i vinte në janar. Kardifi u fut në lojë dhe ofroi 17 milionë euro Nantesit dhe një rrogë shumë të mirë sulmuesit.

28-vjeçari pranoi, ndërsa miqve ju tregoi shkakun e vërtetë. “Nuk është maksimumi, por nuk mund ta duroja më presidentin”. Më pas e dimë të gjithë se çfarë ndodhi. I pari i klubit francez nuk mori pjesë as në ceremoninë mortore të zhvilluar në vendin latin, pasi familjarët e Sala ia bënë të qartë se nuk i garantonin dot siguri maksimale…

Babai i ish-futbollistit, Horacio Sala ka ndërruar jetë mëngjesin e sotëm si pasojë e një ataku kardiak. Mediat argjentinase kanë raportuar se 58-vjeçari ka qenë i shtrirë në dhomën e tij në momentin e atakut. E pabesueshme ajo që ndodh në familjen Sala…

Përfundimisht ata e kanë ndarë vëmendjen dhe nuk kanë ndërmend të paguajnë. Kjo sepse sipas tyre Nanta ka shkelur rregullat e FIFA-s dhe kontrata që ata kishin nënshkruar konsiderohet e pavlefshme për shkak se nuk ishte regjistruar nga liga.

Në artikullin e publikuar nga The Telegraph, thuhet se Nanta nuk kishte bërë me dije se përgjegjës për transferimin e Sala ishte menaxheri Mark MëkKei. Kjo bie në kundërshtim me nenin 3 të Statutit të Lojtarit dhe Transferimeve, që thotë se “klubi duhet të informojë në lidhje me emrin e ndërmjetësit dhe komisionit të tij”. Kështu, Nanta rrezikon edhe të dënohet nga FIFA.

Futbollisti nuk arriti të debutonte me ekipin e ri dhe Kardifi nuk ka pranuar të paguajë deri më tani shumën e kërkuar nga francezët. Çështja ka përfunduar në FIFA, por është tepër delikate dhe disi e komplikuar për t’u zgjidhur, nëse klubet nuk arrijnë të bien dakord.

Kardifi e ka përsëritur qëndrimin e tij, duke insistuar se nuk ka ndërmend të paguajë asnjë qindarkë. Vendimin e tyre e lidhin me faktin që nuk kanë depozituar asnjë dokument zyrtar që dëshmon blerjen zyrtare të Sala.

Sipas raportimeve të “BBC”, Ibotson ishte daltonik dhe nuk i lejohej të fluturonte në errësirë, ose më saktë pas perëndimit të diellit. Në pilotim është thelbësore të bëhet dallimi midis ngjyrës së kuqe dhe asaj jeshile, diçka që Ibotson nuk mund ta bënte në mungesë të dritës së diellit.

Avioni do të nisej ditën e 21 janarit drejt Kardifit të Uellsit në orën 9 të mëngjesit, por Sala vendosi të kalonte ditën e fundit me shokët e Nantesit dhe fluturimi u shty në orën 19:00, fiks 1 orë e 10 minuta pas perëndimit të diellit.

28-vjeçari u transferua nga Nanta te Kardifi dhe ishte gati për të shënuar në Premier. Një gjë e tillë do e ndihmonte të realizonte ëndrrën e madhe për të luajtur me Argjentinën e tij. Avioni që po e transportonte drejt Uellsit u rrëzua dhe të gjithë vajtuan humbjen e tij, madje edhe ata që nuk e kishin parë kurrë të luante.

Dhimbja e madhe për të gjithë, sidomos për familjarët. Mercedes është e ëma e Emilianos. Zemra e saj e di çfarë ka kaluar, por ajo kërkon drejtësi. Siç thotë edhe vetë, pikëllimi, dhimbja dhe zemërimi do e shoqërojnë deri në frymën e fundit, por ajo kërkon të dijë të vërtetën e ngjarjes tragjike. Në një prononcim për “L’Equipe”, Mercedes flet për bisedën e fundit të bërë me djalin e saj dhe dhimbjen e madhe që nuk do zbutet kurrë…

“Unë kisha biseduar me Emilianon përpara se të ngjitej në atë avion dhe i thashë se do ta telefonoja pasi të mbërrinte në hotel në Kardif. Ca orë më vonë tentova të lidhesha me të, por nuk përgjigjej. Provova përsëri pas gjysmë ore, por asgjë. Pastaj mora në telefon agjentin, i cili më tha se avioni ishte zhdukur. Nuk janë kujdesur për të, ashtu siç duhet bërë me një lojtar 17 milionë eurosh.

Shumë gjëra janë të paqarta. Po presim që të kuptojmë pse dhe si vdiq Emiliano. Nëse është faji i neglizhencës së aeroportit, pilotit, apo ndërmjetësit. Ndjej trishtim dhe dhimbje të madhe, por edhe zemërim. Ky pikëllim dhe zemërim do të zgjasë gjithë jetën”, përfundon e ëma e Emilianos së pafat.

Uilli MekKej organizoi fluturimin që i mori jetën sulmuesit 28-vjeçar, me avionin e drejtuar nga David Ibbotson që u rrëzua në Kanalin Anglez, pranë brigjeve të Britanisë së Madhe.

Kardifi ka mohuar prerë pretendimet se ka neglizhuar dhe nuk e ka ndihmuar Salën që të organizonte udhëtimin për në Uells: “Ne ishim në provesin e organizimit të një udhëtimi me avion për zotin Sala, derisa kjo ofertë u refuzua, pasi na u tha që futbollisti kishte planifikuar më parë udhëtimin, për të cilin Kardifi nuk kishte detaje. Jemi shumë të shqetësuar nga shkeljet që janë bërë në këtë udhëtim dhe duam përgjgje për detajet e kësaj tragjedie”.

“Ai ishte braktisur në një hotel, pak a shumë iu desh të organizonte vetë gjithçka”, tha Uelli MekKej në një intervistë për BBC.

“Askush në Kardif nuk dukej se e dinte çfarë duhej të bënte, ishte e sikletshme për një klub të Premier Ligës. Ata blejnë një futbollist për 17 milionë euro dhe e lënë vetëm, para një kompjuteri, për të gjetur linjë ajrore për të udhëtuar drejt Uellsit. Mendoj se Kardifi ka dështuar. Nga mënyra si kanë vepruar, ata janë një fatkeqësi. Është e turpshme të hidhet baltë edhe mbi pilotin, sepse ishte profesionist dhe i zoti, nuk mund të fajësohet ai për tragjedinë”.

Uilli MekKej sqaron se Nanta i detyrohet 1.5 milionë sterlina djalit të tij: “Megjithatë, nuk do të merremi me gjyqe. Nuk është çështje parash, dy njerëz kanë humbur jetën. Nuk vijnë paratë para njerëzve. Unë kam familje, nuk do grindem për ato para, nuk më interesojnë fare, të jem i sinqertë, sepse kam përjetuar ferrin këto javë”.

Sulmuesi argjentinas u shit për shumën e 17 milionë eurove, ndërsa klubi uellsian duhet të paguante këstin e parë prej 6 milionë eurosh.

Të mërkurën e kaluar Kardifit iu dha një afat prej 7 ditësh që të paguante këstin e parë, por kjo nuk ka ndodhur akoma. Nanta ka pritur kalimin e javës dhe ka vendosur të ankohet përsëri në FIFA.

Kardifi ka deklaruar se do të respektojë akordin me klubin francez, por dëshiron të presë mbylljen e hetimeve dhe zbulimin e shkakut të vdekjes së 28-vjeçarit.

Dy javë pas zhdukjes trupi i ish-sulmuesit arriti të gjehej, ndërsa për pilotin ende nuk dihet asgjë, pasi trupi i tij nuk është gjetur. Kur kanë kaluar diçka më shumë se një muaj nga ngjarja famëkeqe, të reja tronditëse dalin nga hetimet e autoriteteve.

Sipas raportimeve të fundit, nga hetuesit thuhet që avioni më të cilin udhëtoi Sala nuk ishte i licensuar për t’u përdorur për fluturim. 

Tifozët e ekipit francez vendosën t’i dhuronin një koreografi fantastike argjentinasit në ndeshjen shtëpiake të 30 janarit kundër Seint Etienit. Emocione të mëdha në stadium, aty ku i madh e i vogël lotonte për zhdukjen e ish-bomberit të tyre.

Megjithatë, rregullorja është një “fe” në Francë dhe klubi i Nantës është gjobitur për sjelljen e tifozëve të saj. Komisioni i Disiplinës ka gjobitur me 16.500 euro klubin francez për përdorimin e materialëve piroteknike dhe hedhjen e objekteve në fushën e blertë nga ana e ultrasve.

Kreu i klubit të Kardifit, Mehmet Dalman, ka qenë i qartë: “Sigurisht, nëse jemi të detyruar me kontratë t’i paguajmë ata, do ta bëjmë diçka të tillë. Ne jemi një klub i nderuar. Por nëse nuk jemi të detyruar – dhe ka disa paqartësi në këtë çështje – atëherë sigurisht do të prisni që unë si kryetar i këtij klubi dhe mbrojtës i interesave të tij, të mbaj pozicion e klubit. Kjo është ajo çfarë po bëjmë”.

Dalman kërkon kohë që gjithçka të sqarohet dhe beson se do ta gjejnë gjuhën e përbashkët me Nantën. “Jemi ende në procesin e grumbullimit të informacionit dhe ky proces do vazhdojë. Dhe kur të arrijmë të sigurojmë nivelin e mjaftueshëm të informacionit, jam i sigurt që do të ulemi me Nantën dhe do t’i japim drejtim kësaj çështjeje.

“Nanta ka kërkuar paratë që beson se i takojnë. Ekziston një proces dhe ata e kanë nisur këtë proces”, shtoi ai. “Ajo që ne po themi është se nuk jemi pjesë e këtij procesi dhe nuk jemi dakord, për shkak të ngjarjeve të jashtëzakonshme dhe rrethanave tragjike. Ne nuk po lëshojmë deklarata pozitive apo negative. Ne thjesht po themi, që ju lutemi të kuptoni se ka shumë pyetje të cilat kanë nevojë për përgjigje. Kjo është ajo që po përpiqemi të bëjmë”, ka përfunduar kreu i klubit të Kardifit.

Shefi i sektorit të arbitrave të UEFA-s, Roberto Roseti ka folur për risinë, duke shpjeguar dhe momentet kur do të ndërhyjë VAR-i.

“Jemi të bindur se teknologjia do të jetë e dobishme për kompeticionin tonë, pasi do të ofrojë një ndihmë të çmuar për arbitrat dhe do të na lejojë të zvogëlojmë vendimet e gabuara. VAR-i do të ndërhyjë vetëm kur ka prova të qarta dhe të dukshme të gabimeve në katër situata: te shkeljet që dërgojnë në shënimin e një goli, penalltitë, kartonët e kuq dhe kur arbitri ngatërron lojtarin gjatë ndëshkimit me karton”.

Në ndeshjet e këtij raundi në Champions dhe Europa League do të mbahet dhe një minutë heshtje për Emiliano Salan. UEFA ka marrë vendimin për të nderuar ish-sulmuesin fatkeq, ndërsa ekipet që dëshirojnë mund të përdorin shirita të zinj në krah.

Në lidhje me ndarjen e tij nga jeta, ka reaguar dhe UEFA së fundmi. Organi më i lartë qeverisës i futbollit evropian, ka vendosur që në ndeshjet e Champions League dhe Europa League, do të mbahet një minutë heshtje në nder të Salës. Gjithashtu, presidenti i UEFA-s, Aleksandër Ceferin, ka folur mbi tragjedinë e ndohur, teksa është shprehur:

“Në emër të gjithë pjesëtarëve të UEFA-s, do të doja të shprehja ngushëllimet më të sinqeta për familjen dhe të dashurit e Emiliano Salës, për humbjen e tij. Jam tmerrësisht i pikëlluar që jeta e tij mori fund në atë mënyrë, në moshë aq të re. I bëj thirrje të gjithë mbështetësve të tij që ta respektojnë kujtimin e tij gjatë”, përfundoi fjalët e tij Ceferin.

Katër ditë më parë zhytësit arritën ta nxirrnin trupin e 28-vjeçarit që ishte zënë midis rrënojave të avionit dhe së fundmi mediet angleze kanë bërë të ditur shkaqet e vdekjes së ish-sulmuesit të Nantes.

BREAKING: Emiliano Sala died of "head and trunk injuries", an inquest hears https://t.co/CXlmbeLYs9

— WalesOnline ??????? (@WalesOnline) February 11, 2019

Sala ka gjetur vdekjen e mënjëhershme nga kontakti i fortë i përplasjes së avionit. Trupi i futbollistit kishte shenja dëmtimesh fatale në kokë dhe në pjesë të tjera të trupit që u shkaktuar fill pas rënies së avionit.

“Shpresoj që ta zhdukin merkaton e janarit. Është skandaloza. Është kriminale. Po kalonim një ecuri të shkëlqyer, ndërsa tani gjithçka ka marrë fund. Me zhdukjen e Emiliano Salës, lojtarët e kanë pasur të pamundur të përqendrohen”, tha trajneri i Nantës.

Së fundmi mediet franceze kanë zbuluar se zbuluar se në transferimin e Emiliano Salës janë ka pasur shumë detaje të cilat nuk i ka ditur dhe vetë lojtari. Halilhodziç me siguri që ka më shumë informacion mbi çka ndodhur dhe ndoshta ky shpërthim i tij mund të jetë i justifikuar.

Thirrja e familjarëve për të rinisur kërkimet e avionit të zhdukur u mbështet nga shumë njerëz dhe më në fund u gjet trupi i tij. Të dashurit e bomberit do të kenë mundësinë t’i bëjnë nderimet e fundit dhe do të kenë një vend për ta qarë dhe “biseduar” me të, sa herë që malli ua djeg zemrat…

Familja e Emilianos ka reaguar për “AFP”, duke i falënderuar të gjithë për dashurinë e treguar në momentin e tyre më të dhimbshëm.

“Tani mund ta qajmë djalin dhe vëllanë tonë. Duam t’u falënderojmë të gjithëve për mbështetjen dhe dashurinë në momentin më të dhimbshëm të jetës tonë. Të shohësh gjithë botën duke u mobilizuar për të na ndihmuar në kërkimet tona ishte një mbështetje e paçmueshme dhe falë kësaj ne do të jemi në gjendje për të nisur zinë për Emilianon”, përfundon deklarata e familjes Sala.

Rrëzimi i avionit me të cilin Sala po fluturonte drejt Kardifit nuk shkoi si duhet dhe 28-vjeçari humbi jetën në mënyrë tragjike. Në orët e vona të ditës së djeshme u gjet edhe trupi i pajetë i Sala, i cili ishte blerë nga Kardifi për shumën rekord të 17 milionë eurove. Por kush janë lojtarët e tjerë që klubet i kanë respektuar duke tërhequr numrat e tyre. Më poshtë ju sjellim listën e plotë.

NGA MILANI, TEK INTERI  – Franko Barezi, ish-mbrojtësi italian i Milanit në periudhën 1977-1997. Kuqezinjtë hoqën nga qarkullimi fanellën me numrin 6 në nder të asaj çka ai dha për skuadrën italiane. Paolo Maldini është padyshim një legjendë Milanit. Lojtari “flamur” i kuqezinjve, nga vitit 1985 deri në vitin 2009, ka fituar gjithçka në nivel klubesh. Një lider në fushë dhe jashtë saj. Milani ishe i detyruar ta tërhiqte numrin tre që ai ka mbajtur gjatë karrierës së tij.

Interi, ashtu si Milani, ka tërhequr dy numra: konkretisht treshin dhe katrën. I pari në nder të ish-mbrojtësit Xhakinto Faketi, i cili më pas u bë edhe president. Si lojtar u aktivizua në periudhën 1960-1978. Prej Havier Zanetit Interi ka tërhequr numrin 4. Argjentinasi veshi fanellën zikaltër nga vitit 1995, deri në vitin 2014.

LEGJENDAT – Edhe braziliani Pele është nderuar nga amerikanët e Nju Jork Kozmos, klub me të cilin legjenda e futbollit botëror është aktivizuar mes viteve 1975-1977. Numri 10 është tërhequr në nder të tij.

Të flasësh për Diego Armando Maradonën duhet një natë dimri. Argjentinasi mahniti botën me kombëtaren e tij dhe me Napolin gjatë periudhës 1984-1991. Klubi italian e nderoi më pas dhe numrin 10 pas tij nuk e ka mbajtur askush në kurriz.

Holandezi fluturues, Johan Krujf, është ndarë nga jeta, ndërkohë që Ajaksi në nder të tij ka tërhequr numrin 14. Sulmuesi bëri epokë, teksa ishte pjesë e holandezëve në dy periudha: 1964-1973 dhe 1981-1983.

Roberto Baxhio është një nga  sulmuesit e shumë-shëtitur në Itali. Ka provuar të veshë fanellën e Milanit, Interit dhe Juventusit. Gjithsesi numrin 10 e ka tërhequr Breshia, që e kishte në ekip bishtalecin në periudhën 2000-2004.

Uest Hemi ka nderuar legjendën Bobi Mur me heqjen e numrit 6 nga qarkullimi. Ish-kampioni i botës me Anglinë në vitin 1966, ka qenë pjesë e londinezëve në periudhën 1958-1974. Mbetemi në Angli, aty ku Çelsi ka nderuar ish-sulmuesin Xhanfranko Zola. Blutë e Londrës kanë tërhequr numrin 25. Italiani ishte pjesë e tyre në periudhën 1996-2003.

“MODË” NË ITALI – Davide Astori është përjetësuar te Fiorentina, klub që ka hequr nga qarkullimi fanellën me numrin 13 që e mbante kapiteni. Italiani vdiq vjet në prill dhe me ekipin vjollcë luante që prej vitit 2015. Edhe Kaljari, ish-klubi i tij në periudhën 2008-2014, e ka tërhequr numrin 13.

Piermario Morosini është një nga ata lojtarë që ka vdekur në fushën e blertë. I ndodhi kur ishte pjesë e Livornos në vitin 2012. I njëjti klub ka tërhequr edhe numrin 10, ndër të ish-sulmuesit Igor Proti. Italiani ka qenë  pjesë e këtij klubi në periudhat 1985-1988 dhe 1999-2005.

Bolonja ka tërhequr numrin 27 në nderim të mbrojtësit Nikolo Gali, pjesë e kuqebluve në sezonin 2000-2201. Te Kievo numri 30 nuk mbahet më nga asnjë lojtar. Xhason Majele, ish-sulmuesi i Republikës Demokratike të Kongos është nderuar me këtë veprim të klubit. Edhe Peskara ka bërë të njëjtën gjë me Vinçenzo Zukini, lojtar i tyre nga vitit 1973 deri në 1979. Numri 25 është tërhequr edhe nga Viçenca, që e ka pasur në ekipin Morosinin në periudhën 2007-2009.

Xhenoa ka tërhequr numrin 6, që është mbajtur nga Xhanluka Sinjorini, mbrojtësi italian që ka qenë pjesë e këtij klubi në periudhën 1988-1995. I njëjti klub ka tërhequr edhe numrin 7, që ëshët mbajtur nga Marko Rosi. Ky i fundit ka luajtur me Xhenoan në sezonin 2003-2004 dhe më pas në periudhën 2005-2013.

Kaljari ka respektuar ish-sulmuesin Xhixhi Riva. Lojtari, që spikati në vitet 1963-1976, mbante asokohe numrin 11. Klubi sard e ka tërhequr numrin e mbajtur prej Rivës.

NGA SPANJA, NË ANGLI – Antonio Puerta pësoi atak kardiak në fushë dhe më pas vdiq. Mesfushori spanjoll “detyroi” Seviljen të tërheqë numrin 16 në nder të tij. Ai ishte pjesë e klubit andaluzian në periudhën 2003-2007.

Mark Vivian Foe vdiq në fushë në një ndeshje të Kamerunit. Ai ishte pjesë e Mançester Sitit në sezonin 2002-2003 dhe klubi anglez ka tërhequr numrin 23 që mbahej nga mesfushori.

Francezët kanë marrë fillimisht një këst prej 6 milionë eurosh dhe tani ka një “betejë” për pjesën tjetër të pagesës. Momentalisht Kardifi refuzon të paguajë, por mund t;i presë një dënim i rëndë nëse e bëjnë diccka të tillë.

“The Times” raporton se FIFA është fati t’i bllokojë merkaton klubit uellsian. Afati për të shlyer pagesën prej 11 milionë është 10 ditë. Nëse shkelet afati, atëherë pritet që Kardifi të dënohet nga qeveria e futbollit botëror.

Lajmi bëhet i ditur nga autoritet angleze, që kryen analizat e nevojshme mbi kufomën në morgun e qytetit të Bornmuthit.

Ndërkohë, kërkimet për trupin e pilotit anglez Dejvid Ibotson vazhdojnë. Familja e Emiliano Salës është lajmëruar dhe në ditët në vazhdim do të kryhet ceremonia mortore në Argjentinë.

#Update The body brought to Portland Port today has been formally identified by HM Coroner for Dorset as that of professional footballer Emiliano Sala.

The families of Mr Sala and pilot David Ibbotson have been updated. Our thoughts remain with them all

https://t.co/YpVTvaEt7P

— Dorset Police (@dorsetpolice) February 7, 2019

Familja dhe të gjithë tifozët e futbollit shpresojnë që të gjendet trupi i sulmuesit argjentinas, ndërsa një mik i tij ka befasuar me deklaratën e bërë. Masimiliano Duarte është një nga shokët më të ngushtë të 28-vjeçarit fatkeq.

Në një prononcim emocional për “Argentina TV”, Duarte zbulon se Sala është detyruar të udhëtojë me 21 janar drejt Kardifit, pavarësisht se ka qenë i lodhur dhe ka preferuar të pushojë. Dikush mban përgjegjësi, por Duarte ka bërë një pakt burrash me shokët e tjerë.

Ata nuk do të nxjerrin asnjë informacion, derisa të zbardhet komplet ngjarja e ndodhur. Pavarësisht se nuk përmend emra, miku i lojtarit “shigjeton” Uilli Mek Kein, personin që kreu transferimin e lojtarit nga Nanta te Kardifi dhe atë që organizoi udhëtimin me avionin Piper Malibu PA-46.

“Emiliano nuk dëshironte të udhëtonte me atë avion. Këto janë detyrime që një futbollist duhet t’i pranojë. Sigurisht që ai ishte kundër kësaj. Unë kam luajtur vetë futboll dhe të këshillohet që të çohesh herët, të konsumosh mëngjesin, të udhëtosh më pas drejt destinacionit dhe të pushosh. Ai është detyruar të udhëtojë. Kemi disa mesazhe mes miqsh, por kemi bërë një pakt me njëri-tjetrin për të mos treguar asgjë më shumë, derisa të zbardhet ngjarja.”

“Emiliano më tha: nuk kam ndalur gjithë ditën dhe nuk mund të pushoj. Audio e mesazhit është e qartë. Ai më ka dërguar dhe disa mesazhe të tjera më përpara, ku më tregonte se dëshironte të pushonte dhe të flinte gjumë. ‘Nuk dua të udhëtoj, do të preferoja të qëndroja këtu sonte’, më ka shkruar Emiliano. Ai nuk ka dashur të udhëtojë dhe dikush është përgjegjës për këtë gjë”, përfundon Masimiliano Duarte.

Një postim emocionues në rrjetet sociale ka bërë dhe motra e Emilianos. Një foto dhe pak fjalë… Aty shfaqet qeni i lojtarit, Nala që sheh nga jashtë në pritje të padronit të dashur. “Nala gjithashtu po pret për ty“, shkruan Romina, motra e lojtarit.

Për momentin nuk bëhet e ditur se trupi i cilës prej viktimave është gjendur. Gjetja e avionit të zhdukur prej dy javësh u bë e mundur prej kërkuesve privat, të cilët u kontraktuan, pasi një fushatë e nisur në internet grumbulloi mbi 300 mijë euro nga donacionet e më shumë se 200 personave nga anembanë botës.

DEKLARATA E LËSHUAR NGA DEGA E HETIMIT TË  AKSIDENTEVE AJRORE

“Pajisja kërkuese e komanduar nga ne kërkoi të gjithë zonën përreth rrënojave të avionit,  por nuk u bë e mundur gjetja e pjesëve të tjera. Tragjikisht në pamjet video që na u përcollën nga pajisja, dallohet një trup. Ne së bashku me konsultimin e  policisë dhe familjarëve, po mendojmë për hapat e radhës që duhen ndërmarrë”.

Autoritetet shtetërore të dy vendeve u dorëzuan pasi disa ditë kërkimesh, ndërsa në internet nisi një fushatë për mbledhjen e fondeve për të rinisur kërkimet. Të gjithë dhuruan diçka, mes tyre dhe shumë futbollistë dhe kërkuesit privatë nisën punën.

Gjatë ditës së djeshme u gjet dhe avioni Piper Malibu u gjet afër ishullit Alderney, falë përdorimit të një pajisjeje sonate të përparuar. Dy trupat nuk janë gjetur akoma, ndërsa familjarët ishin të parët që morën vesh lajmin e kobshëm. Horacio Sala, babai i Emilianos, shpreh gjithë dhimbjen e tij në një prononcim për “Cronica TV” dhe akoma nuk arrin ta besojë atë që ka ndodhur.

“Nuk arrij ta besoj, kjo është një ëndërr, një ëndërr e keqe. Jam shumë i dëshpëruar. Kam qenë çdo ditë në kontakt me ekipet e kërkimit, por meqë nuk kam Whatsapp, është e vështirë t’i telefonosh ose të më telefonojnë. Ditët kalonin dhe nuk po merrja vesh asnjë lajm për Emilianon dhe avionin e zhdukur”, flet babai i sulmuesit fatkeq.

Autoritetet shtetërore të Britanisë së Madhe dhe Francës pezulluan kërkimet katër ditë pas zhdukjes së lojtarit, por një kompani franceze hapi një fushatë për të ndërmarrë një kërkim privat (lexo këtu), diçka që për të cilën u grumbulluan mbi 300 mijë euro. Një pjesë e konsiderueshme e këtyre parave u dhuruan nga futbollistë të famshëm si Adrien Rabio (50 mijë euro), Kilian Mbape (30 mijë euro) dhe Dimitri Paje (10 mijë euro).

Ishin pikërisht kërkuesit privatë ata që kanë gjetur avionin pas kërkimeve me radar në zonën, ku avioni u zhduk. Të dyja familjet e të prekurve janë njoftuar për gjetjen e aeroplanit.

Ai quhet Uilli Mek Kej dhe është personi që organizoi dhe fluturimin fatal. Konkret dhe shumë cinik, agjenti i prezantohej argjentinasit në këtë mënyrë. Ai i shpjegon lojtarit mënyrën se si funksionon bota e merkatos dhe fjalët e shumta që qarkullonin rreth transferimit të tij në Premier Ligë.

“Emiliano, emri im është Uilli Mek Kej. Ne nuk na interesojnë çështjet e tua personale: llogaritë bankare, pushimet apo babysitter. Ky nuk është biznesi ynë, sepse ne bëjmë vetëm transferime lojtarësh. Deri tani kemi kaluar shifrën 600, duke përfshirë ato të Drogba, Anelka, Pajet, Seri dhe Anguisa. Ne nuk themi që ‘jemi si baballarë për lojtarët tanë’. Jo, nëse ti nuk do të ishe një futbollist, nuk do të ishim interesuar kurrë për ty. Në fund të fundit, jemi të gjithë të interesuar vetëm për para dhe natyrisht që duam të fitojmë sa më shumë. Aspak ndjenja, ne bëjmë vetëm biznes.”

“Eksperienca ime më thotë që nëse nuk do të zgjedhësh në këtë moment Premier Ligën, atëherë do të pendohesh më vonë. Dikush ka thënë që ty nuk të intereson Kardifi, por ndoshta është faji ynë. Kemi zbuluar se ka dhe klube të tjera që duan të blejnë kartonin tënd si: Evertoni dhe Uest Hemi. Një mënyrë për të simuluar interesin. Ne punojmë në këtë mënyrë, pavarësisht se mund të keqinterpretohet nga futbollisti. Por pa këto zëra, askush nuk do të njihte, sepse, sinqerisht, askush nuk e ndjek kampionatin francez.”

Marrëveshja u arrit, madje Mek Kej sponsorizoi dhe udhëtimin e fundit tw sulmuesit 28-vjeçar. Madje edhe agjenti cinik e ka kuptuar fatin e tij mizor: “Nëse nuk do ia kisha kërkuar kurrë mandatin Nantës për të negociuar për transferimin e Salës, ai do ishte ende mes nesh“. Ndonjëherë, nuk është thjesht biznes…

Kur kanë kaluar diçka më shumë se një javë dalin të reja, të cilat mund të çojnë në gjetjen e mundshme të tij. Sipas raportimeve të fundit, thuhet se në një plazh në veri të Francës janë gjetur mbetje të dy ndenjëseve të avionit dhe besohet që i përkasin mjetit që fluturonte Emiliano Sala.

ULTIMO MOMENTO: encuentran 2 asientos en playa de la peninsula de Contentin, region de Normandia, norte de Francia. Las autoridades francesas creen que son del avion de Emiliano. Ya chequean las autoridades de las Islas del Canal de la Mancha. pic.twitter.com/C92Ajb5toP

— Christian Martin (@askomartin) January 30, 2019

Tashmë, pritet që të nisim përsëri kërkimet në zonën, ku është raportuar se janë gjetur mbetjet. Shpresat për të gjetur të mbijetuar, thuajse janë shuar, por asnjëherë nuk i dihet dhe pritet se çfarë do të ndodhë në ditët në vijim.

Gjithsesi, në sfidën e sotme, ka rënë në sy gjesti i bërë nga ekipi i Kardifit përpara ndeshjes. Në listën e lojtarëve, vihet re se është dhe emri i Emiliano Salës, i cili në vend të numrit në fanellë, i kanë vendosur një lule.

Gjest i madh nga Kardif Siti, teksa gjatë javës së shkuar gjithashtu, pranë stadiumit të ekipit kanë bërë shumë homazhe.

Nil Uornok trajnon prej 40 vitesh, por nuk është ndjerë kurrë me keq në karrierë. 70-vjeçari anglez e vuan më shumë se të gjithë zhdukjen e Salës. Ai kishte biseduar gjatë me të dhe kishte arritur ta bindë për të zgjedhur ekipin e tij.

Në një prononcim për “The Sun”, trajneri i Kardifit flet me lot në sy për lojtarin, të cilin nuk e stërviti kurrë. Uornok tregohet i sinqertë dhe e pranon se ka menduar të largohet nga futbolli. Ai ka biseduar gjatë me djemtë e tij, disa prej tyre e kanë përjetuar shumë keq zhdukjen e shokut të ri të skuadrës dhe në ekipin uellsian ka vetëm heshtje dhe shumë dhimbje.

“E kam të pamundur të fle gjumë. Jam prej 40 vitesh pjesë e futbollit, por kjo ka qenë dhe vazhdon të jetë java më e vështirë e karrierës time. Nuk arrij ta kuptoj këtë situatë dhe kam menduar të tërhiqem. Ka qenë një javë e tmerrshme dhe nuk ka një moment që nuk mendoj për të. Ngjarja e Salës më ka prekur më shumë se çdo gjë tjetër. Mbes pa fjalë kur shoh Rominën, motrën e Emilianos, dhe gjithë familjen e tij, dhe gjithçka bëhet e ndërlikuar. Vazhdoj t’i shoh fëmijët e mi, dhe pyes veten çfarë do isha duke bërë në vend të tyre. Kur ka njerëz të tjerë vërdallë jam OK, por kur jam vetëm në shtëpi e mendoj këtë gjë.“

“Jam takuar me djemtë e ekipit dhe kemi biseduar gjatë së bashku. 3-4 prej tyre e kanë përjetuar shumë keq këtë histori dhe ndodhen në një situatë të vështirë psikologjike. E kisha takuar më parë Emilianon dhe kam biseduar disa herë me të në javët e fundit. E di shumë mirë se me sa dëshirë po e priste nisjen e aventurës me ekipin tonë. Vazhdoj ta quaj atë Emile, sepse nuk arrija t’ia shqiptoja saktë emrin. Gjatë takimeve tona më thoshte se “do të shënoj shumë gola”, ndërsa unë i përgjigjesha “e di që do ia dalësh.“

“Nuk e harroj kurrë kur e ftova të vinte për të ndjekur ndeshjen tonë në Njukasëll, por ai më tha që dëshironte shumë të kthehej për të përshëndetur për herë të fundit shokët e tij te Nantes… Në një botë ideale, nuk besoj se do të dëshiroja të zhvilloja më ndeshje dhe nuk do të doja të isha më trajner, pasi ashtu e ndjej në këto momente. Futbolli është i rëndësishëm, por besoj se tragjedi të tilla ta ndryshojnë shumë perspektivën e të jetuarit…“

Fushata për mbledhjen e fondeve për rinisjen e kërkimeve për futbollistin Emiliano Sala rezultoi e suksesshme. Me anë të platformës online “GoFundMe”, mbi 3000 persona nga e gjithë bota kontribuuan për të kapur objektivin prej 300 mijë euros.

Mjaftoi vetëm një ditë e gjysmë për të arritur shumën e kërkuar. Megjithatë një detaj që ka marrë vëmendjen e medieve është fakti se shumat më të mëdha i kanë dhuruar futbollistë të ndryshëm, kryesisht ato të kampionatit francez.

Kontributin më të madh e ka dhënë Adrien Rabio. Mesfushori i PSG-së dhuroi fillimisht 25 mijë euro, ndërsa pak orë më vonë vendosi të dhuronte po të njëjtën shumë. Kolegu i tij Kilian Mbape ishte dha kontributin e dytë më të madh me 30 mijë euro, ndërsa dyshja e Marsejës Dimitri Paje dhe Lukas Okampos dhanë nga 10 dhe 5 mijë  euro.

Blerja e re e Kardif Sitit nuk arriti të debutojë me ekipin e ri dhe nuk dihet asgjë për fatin e tij. Avioni që po e rikthente në ishull pas takimit të fundit me shokët e Nantes nuk mbërriti kurrë në destinacion dhe nuk ka asnjë gjurmë për të. Policia e Guernseyt u dorëzua pas tre ditë kërkimesh, ndërsa familja e tij bën apel për të rinisur kërkimet.

Dhimbjes dhe vuajtjeve të familjes i janë përgjigjur shumë njerëz dhe në internet kanë nisur organizmin për të mbledhur shumën e 300 mijë eurove. Një gjë e tillë ka ndodhur shumë shpejt dhe paratë janë siguruar.

E veçanta ka ndodhur në ndeshje Miluoll-Everton. Siç raporton “The Mirror”, të dy klubet nuk kanë zbatuar urdhrin për të zbritur në fushë me shirita të zinj. Shkaku? Drejtuesit e klubeve nuk e quajnë të vdekur zyrtarisht sulmuesin dhe besojnë akoma se ai mund të jetë diku duke pritur ndihmë.

Më të vështirë se të gjithë do e ketë Kardifi, që do të zbresë në fushë kundër Arsenalit. Ndeshja e kampionatit zhvillohet të martën dhe për ekipin uellsian do të jetë e vështirë dhe një ndeshje ndryshe nga të tjerat.

Fushata u realizua në platformën online “GoFundMe”. Paratë do të përdoren për të filluar kërkimin në det në mënyrë private, pasi institucionet shtetërore hoqën dorë nga kërkimet 48 orë pas zhdukjes së avionit.

Komuniteti i futbollistëve ka qenë ndër kontribuuesit më të mëdhenj në këtë fushatë. Mjafton të përmendim faktin se donacioni më i madh ka ardhur nga futbollisti i PSG-së, Adrien Rabio, dhuroi 25 mijë euro.

Shuma që po tentohet të mblidhet me anë të platformës “Go Fund Me” është 300 mijë euro. Në mënyrë të pabesueshme brenda një ditë janë mbledhur 215 mijë euro dhe është vetëm çështje orësh para se objektivi i vënë të kapet.

Mbi 2000 veta kanë kontribuar në këtë platformë, por donacioni që bie më shumë në sy është ai mesfushorit të PSG-së Adrien Rabio, i cili dhuroi 25 mijë euro në një transaksion të vetëm.

Vendimi i marrë nga autoritet angleze erdhi si pasojë e kalimi të afatit të 48 orëve çka i zeron shanset që të ketë të mbijetuar nga aksidenti ajror i ndodhur në hapsirën detare që ndan Francën deh Britaninë e Madhe.

Në një deklaratë të zyrës së presidenciale të Argjentinës thuhet: “Presidenti Maurisjo Makri ka udhëzuar ministrin Horhe Fauri që të bëjë një kërkesë formale ndaj qeverive të Britanisë së Madhe dhe Francës për të bërë të mundur vijimin e kërkimeve”.

Autoritetet e Guernseyt prej tre ditësh kanë bërë kërkime, të cilat kanë nisur çdo mëngjes dhe janë mbyllur deri kur është errësuar, por deri në këto momente, ende nuk ka pasur asnjë shenjë. Ditën e sotme, më saktë para pak momentesh, policia e Guernseyt ka postuar në “Twitter”, vendimin që ndoshta mbyll gjithçka.

3.15pm Update.

Please read the attached statement.

Unless there is a significant development, there will be no further updates pic.twitter.com/jbEIFMB3zi

— Guernsey Police (@GuernseyPolice) January 24, 2019

Sipas autoriteteve dhe kapitenit David Barker, kërkimet janë mbyllur përfundimisht. Prej tre ditësh kërkime intensive me tre avionë, 5 helikoptera si dhe dy varka shpëtimi, tashmë është vendosur që kërkimet të ndalojnë. Në një letër të hapur, kapiteni Barker ka sqaruar të gjithë opinionin si dhe i ka shprehur ngushëllimet e tij familjeve. Ndoshta dhe shpresat e fundit u shuan…

Kërkimet ishin pezulluar si pasojë e stuhive dhe shikueshmërisë së vogël, por policia ka nisur kërkimet në zonat bregdetare, siç lajmëron në rrjetet sociale. Pesimizmi është i madh dhe shanset e shpëtimit të pilotit dhe Salës janë të vogla, duke llogaritur dhe temperaturat e ulta të ujit. Orë ankthi për tifozët e Nantës dhe Kardifit, por jo vetëm.

Ngjarja e ndodhur me 28-vjeçarin ka trishtuar gjithë tifozët e futbollit, ndërsa më të vështirë se të gjithë e ka familja e tij… Ata dhe të gjithë luten, besojnë akoma me shpresën që Emiliano do të jetë gjallë dhe duke pritur ndihmë…

Por diçka befasuese ka dalë nga hetimet e kryera, pasi piloti i dytë nuk është nisur me avionin e zhdukur. David Henderson kishte kaluar kontrollet e fundit së bashku me pilotin e parë Ibotson dhe futbollistin, por ai ka vendosur të kos e ndërmarrë këtë fluturim.

Lajmi raportohet nga “Ouest France”, që tregon dhe postimin pilotit të dytë në rrjetet sociale. “Në kundërshtim nga çfarë po flitet nëpër media, unë nuk kam vdekur. Nuk isha në atë avion…”, shkruan Henderson. Tashmë atij do i duhet t’u japë shpjegime autoriteteve për arsyet e mungesës së tij.

Misteri rritet dhe më shumë nga fakti që Ibotson i kishte shkruar një mikut të tij pak ditë përpara ngjarjes tragjike. “Jam konsumuar pak me sistemin e uljes…”, shkruante publikisht piloti i parë për avionin ku u ngjitën për herë të fundit ai dhe Emiliano Sala.

24th January
7.50am update.

We are commencing a coastal search using be Channel Islands Air Search plane of Burhou, the Casquets, Alderney, the north coast of the Cherbourg Peninsula, north coast of Jersey and then back over Sark.

Further information released when available

— Guernsey Police (@GuernseyPolice) January 24, 2019

Mbrëmjen e 21 janarit, në orën 20:30, avioni Peper Malibu në të cilin udhëtonte Emiliano Sala, lojtar i ekipit të Nantës në Ligën parë franceze, pati kontaktin e fundit me qendrën e kontrollit. Italo-argjentinasi ishte nisur nga Nanta në drejtim të Kardifit, ekipit të tij më të ri në Premier Ligë.

Momentalisht, kur kanë kaluar më shumë se 36 orë nga zhdukja e mistershme, pavarësisht kërkimeve, ende nuk ka asnjë shenjë të lojtarit apo të pilotit që ishte në bordin e avionit. Lumturia e 28-vjeçarit, i cili para pak ditësh firmosi kontratën e jetës duket se nuk zgjati shumë.

Zakonisht, kur një njeri humbet jetën, atëherë nis dhe vlerësohet, por rasti i Emiliano Salës nuk është i tillë. Gjithnjë, në Francë sidomos, është cilësuar si një nga sulmuesit më luftarakë që kanë luajtur në Ligën e parë.

E nisi rrugëtimin e tij në Evropë duke kaluar menjëherë nga Argjentina në Ligën e parë franceze, ku e priste Bordoja. Në atë kohë vetëm 20 vjeç, nuk arriti të “çante” në ekipin e parë dhe luajti me rezervat. Djaloshi 20-vjeçar shënon 11 herë në 29 ndeshje si titullar në sezonin e tij të parë. Jo keq për një të sapoardhur nga Argjentina.

Tre sezonet e ardhshme i kalon në huazime, fillimisht në “National” (liga e tretë franceze), me ekipin e Orleans. 19 golat e ndihmojnë që sezonin e ardhshëm të hauazohet te Niorti në “Ligue 2”. Përsëri sezon pozitiv, teksa tund rrjetën 18 herë në 37 takime, duke qenë pikë referimi për ekipin e tij.

Në verën e 2014, pritej rutina e përhershme. Kthim te Bordoja dhe huazim diku tjetër. Por këtë herë nuk ndodhi kështu, pasi zhirondinët vendosën t’i besonin. Gjysmë sezoni me Bordon, asgjë për t’u përmendur, vetëm katër takime si titullar dhe një gol i shënuar. Në janar kthehet te rutina…

Kaeni i beson dhe e merr në huazim. Gjysmë sezoni i mjaftoi për të luajtur, shtatë takime si titullar dhe gjashtë si zëvendësues. 5 gola të shënuar, me një mesatare, gol çdo dy ndeshje. Aq i mjaftoi, Emiliano Salës që të bindte Nantën të paguante 1 milionë euro për ta marrë në radhët e tyre.

Sezoni i parë ishte si nxehmje për italo-argjentinasin, i cili shënoi vetëm 6 gola në 22 ndeshje si titullar. Pavarësisht se nuk dha më të mirën në vitin e parë në Nantë, sezoni 2016/2017 do të ishte një ndër më të suksesshmit për Emiliano Salën, teksa me 12 gola ndihmoi ekipin e tij të renditej në vendin e shtatë në Ligën e parë.

I njëjti rendiment vijoi dhe në sezonin pasardhës ku shënoi 12 herë dhe Nanta e tij u rendit e nënta. Për të ardhur në sezonin aktual. Padyshim, më i miri në gjithë karrierën e tij. Një fazë e luajtur, 12 gola të shënuara me “kanarinat”. Ato që kishte bërë sezonin e shkuar dhe dy sezone më parë, i bëri në vetëm një fazë këtë vit.

U përfol pafund, teksa në një periudhë rivalizonte dhe yjet e PSG-së për golashënuesin më të mirë, si dhe ishte një ndër sulmuesit argjentinas më me shumë gola të shënuar këtë sezon. Gjysmë sezoni perfekt, u kurorëzua me interesimin dhe kalimin në Premier Ligë. Padyshim, një ëndërr për çdo lojtar. 17 milionë euro në tavolinë për Nantën dhe një kontratë me shifra të majme për sulmuesin.

“Ka ardhur Sala i ri në qytet. Shumë i lumtur që nënshkruaj këtu. E di që sfida është e madhe, por së bashku do t’ia arrijmë. Pres me padurim të zbuloj Premier Ligën dhe skuadrën”, ishin këto fjalët e sulmuesit pas nënshkrimit të kontratës me Kardifi Sitin.

Pas këtij postimi, është dhe një postim i fundit. Ai me ish-ekipin e tij, të cilët kërkoi vetë t’i takonte dhe mori leje në klubin e Kardifit. Shkrimi në foto “La ultima ciao”, nuk ka nevojë për shumë koment. Ndoshta ka qenë me të vërtetë lamtumira e fundit…

“E imagjinoj që tani që Emiliano ka zbritur në një plazh në Guernesey dhe me pilotin në shpatulla po thotë: e kam hundën e thyer, por do të luaj të shtunën”.

Të gjithë jemi me sytë nga qielli dhe lutemi që këto fjalë të bëhen realitet dhe “luftëtari” Sala të shfaqet për të tundur rrjetën dhe për të çuar peshë tifozët përsëri…

Bëhet fjalë për një foto “selfie”, që CR7 e ka shkrepur në bordin e një avioni. Gjithçka do të ishte krejt normale, por në situatën e ditëve të sotme, ku vëmendja kryesore e botës së futbollit i është kushtuar zhdukjes së avionit që mbante në bord sulmuesin argjentinas Emiliano Sala.

??? pic.twitter.com/zC80kfMES8

— Cristiano Ronaldo (@Cristiano) January 22, 2019

Fotoja e portugezit ka sjellë reagime dhe nga figura të sportit, një ndër to Geri Lineker. Ish-futbollisti anglez iu përgjigj pesë herë fituesit të Topit të Artë në rrjetin social “Tëitter”, duke i shkruar: “Nuk është dita për këtë postim,  me të vërtetë nuk është”.

Not the day for this tweet. It really isn’t. https://t.co/61y6cgEzm0

— Gary Lineker (@GaryLineker) January 22, 2019

Më pas anglezi shpjegoi se është i bindur se Ronaldo nuk ka qenë në dijeni të lajmit kur është postuar foto, por të paktën dikush i afërt duhet ta kishte informuar.

Ndërkohë, gjatë orëve të fundit ka ardhur një rrëfim tronditës nga Uruguai. Futbollisti Diego Rolan, lojtari i përfaqësueses uruguaine dhe koleg i Salës, kur luanin të dy së bashku vite më parë te Bordoja, ishte i ftuar në një emision radioje, ku tha se kishte marrë vesh se Sala kishte shkëmbyer mesazhe me një mik të ngushtë gjatë fluturimit.

“E di që Emiliano i ka dërguar një mesazh një miku ndërsa ishte në avion dhe para se të zhdukej sinjali, duke i thënë që kishte frikë dhe se nëse nuk do e gjenin, do e kishte ditur atë që kishte ndodhur”, tha Rolan.

17.00 update

Search and rescue operations have been suspended as the sun has now set.

The current plan is for it to resume at sunrise tomorrow.

There will be no further updates tonight.

— Guernsey Police (@GuernseyPolice) January 22, 2019

Sipas raportimeve të fundit nga “Guernsey Police”, kërkimet janë pezulluar, si pasojë e perëndimit të diellit dhe do të rinisin ditën e nesërme. Gjithnjë, sipas policisë së Guernsejt, në rast se avioni ka rënë në ujë, shanset që të ketë të mbijetuar janë shumë të pakta, përderisa nuk është gjetur ende asgjë.

2/2

We have found no signs of those on board. If they did land on the water, the chances of survival are at this stage, unfortunately, slim.

Two planes and a lifeboat are still searching.

A decision about an overnight search will be taken shortly

— Guernsey Police (@GuernseyPolice) January 22, 2019

Në rast se nuk ndodh ndonjë mrekulli, kjo do të ishte tragjedia e dytë ajrore për Premier Ligën dhe futbollin brenda pak kohësh, pasi kujtojmë, presidenti i Lesiter Sitit humbi jetën pas përplasejes dhe shpërthimit të helikopterit të tij.

1/2

During the course of the 15-hour search, which used multiple air and sea assets from the Channel Islands, UK and France, a number of floating objects have been seen in the water. We have been unable to confirm whether any of these are from the missing aircraft.

— Guernsey Police (@GuernseyPolice) January 22, 2019

28-vjeçari ka qenë në bordin e avionit të zhdukur, por akoma nuk ka informacion të qartë për ngjarjen e ndodhur pranë farit “Casquets”, në Kanalin e La Manshit.

Dy helikopterë, dy avionë dhe një barkë shpëtimi po kërkojnë avionin PA 46 Malibu, siç raporton policia e ishullit Guernsey. “Kontaktet me avionin janë humbur rreth orës 8:30 të mëngjesit.” Babai i lojtarit, Horacio Sala, ka folur për “Radio Continental”, duke treguar momentin e fundit që ka biseduar me djalin e tij.

“Ndodhem në Argjentinë dhe nuk kam asnjë informacion, përveç faktit që po udhëtonte me një avion të vogël. Një shok më tregoi për ngjarjen e ndodhur. Jam në Rosario dhe po vdes nga dëshpërimi. Për herë të fundit kam folur të dielën me Emilianon dhe shpresoj që gjithçka të shkojë mirë dhe ai të gjendet.”

“Di që avioni ishte i presidentit të Kardifit, ata na informuan se avioni ishte zhdukur dhe se po vazhdojnë kërkimet për të”, shprehet Mercedez, nëna e sulmuesit.

Rojet bregdetare angleze kanë lajmëruar se incidenti ka ndodhur jashtë zonës territoriale të Anglisë, ndërsa kërkimet për të vazhdojnë. Pretendohet se avioni ka patur probleme në motor dhe ka fluturuar rreth 5-6 milje në një situatë të tillë.

Klubi i Nantës i ka kërkuar federatës franceze shtyrjen e ndeshjes së kupës kundër Entente SSG, që ishte programuar të zhvillohej nesër. Presidenti i klubit francez, Valdemar Kita, ka folur për “CNEWS”, duke deklaruar se shpreson që ai të jetë gjallë.

“Emiliano ishte një djalë i mrekullueshëm dhe gëzonte respektin e të gjithëve. Mendimet e mia shkojnë për familjen dhe miqtë e tij. Nuk dimë akoma asgjë se çfarë ka ndodhur, por shpresoj që ai të jetë diku. Nuk e dija as që ai kishte ardhur të takohej me shokët e ekipit para se të largohej. Shpresoj që ta gjejmë.”