Zhordi Alba

Barça “ekzekuton” blerjen e radhës, Alba ka një zëvendësues klasi

Sport Ekspres — Sun, 04 Aug 2019 09:37:23 +0000

Barcelona duket se është në mbyllje të operacionit për të sjellë Zhunior Firpo në “Camp Nou”. 22-vjeçari ka treguar cilësi të larta me Real Betis dhe Barça e dëshiron në gjirin e saj për të pasur një zëvendësues dhe pasardhës të denjë për Zhordi Albën.
Marrëveshja me lojtarin është mbyllur dhe finalizimin e këtij transferimi e ndajnë vetëm pak milionë. Real Betis dëshiron 25 milionë bashkë me bonuset. Barça këmbëngul se nuk jep më shumë se 21 milionë. Një diferencë shumë e ulët, që mund të rregullohet nëpërmjet një zgjidhje alternative.

“Sport.es” raporton se në orët e ardhshme gjithçka do të mbyllet. Firpo është një prej më të mirëve të krahut të majtë në La Liga. Titullar i padiskutueshëm dhe lojtar mjaft krijues. Sezonin e fundit të La Ligas e mbylli me 3 gola dhe 4 asiste. Ishte pjesë e rëndësishme e kombëtares U21 të Spanjës në kampionatin evropian.

Alaba në merkato, në Spanjë e duan me çdo kusht

Sport Ekspres — Fri, 19 Jul 2019 07:51:26 +0000

E përditshmja katalanase “Mundo Deportivo” ka hapur faqen e parë të gazetës me lajmin për interesimin e Barcelonës për David Alabën. Drejtuesit katalanas duan të kenë një konkurrent të denjë për Zhordi Albën, i cili prej vitesh nuk njeh rivalë në krahun e majtë të mbrojtjes.

Austriaku e ka thënë hapur se e intrigon fakti i të luajturit në një kampionat jashtë Gjermanisë. Megjithatë, transferimi i mëngjarashit s’do të jetë aq i lehtë pasi Alaba ka dhe dy vite të mbetura në kontratën me kampionët e Gjermanisë.

Një lojtar i kalibrit të 27-vjeçarit nuk mund të vijë pa 50 milionë euro, por në Barcelonë paratë nuk janë problem prej vitesh. Gjithsesi në fund përgjigja përfundimtare i takon drejtuesve të Bajernit, të cilët në rast të shitjes së mbrojtësit do duhet t’ia besojnë krahun e majtë francezit Lukas Hernandez, i cili është blerja rekord e klubit.

Barcelona mbulon me para Zhordi Albën, detajet e kontratës “faraonike”

Sport Ekspres — Sun, 23 Dec 2018 15:39:08 +0000

Është mbyllur më në fund “saga” e negociatave midis Zhordi Albës dhe klubit të Barcelonës. Sipas medies katalanase “RAC 1”, të dyja palët kanë rënë dakord për të nënshkruan një rinovim për pesë vitet e ardhshme.

Falë kontratës së re, 29-vjeçari do të përfitojë nëntë milionë euro në sezon, çka e bën atë mbrojtësin e gjashtë më paguar në botë, pas Serxho Ramos, Marselo, Van Dajk, Dani Alvesh dhe Tiago Silvës.

Alba është një produkt i akademisë së Barcelonës. Pas një eksperience të shkurtër te Valencia mëngjarashi u kthye në vendlindje, ku prej vitesh ka blinduar vendin e titullarit.

Zbulimi i ish-it Vidal: Zhordi Alba dhe Luis Enrike kanë një raport të keq!

Sport Ekspres — Sat, 13 Oct 2018 12:48:41 +0000

Aleksis Vidal u transferua nga Sevilja te Barcelona në vitin 2015, për shumën e 17 milionë eurove. Anësori i djathtë u mor si zëvendësues i Dani Alvesh, por Vidal nuk gjeti shumë hapësira në ekipin katalanas dhe sezonin e kaluar u rikthye përsëri në Andaluzi. Në një prononcim për “ElDesmarque”, 29-vjeçari tregon raportin me trajnerin Luis Enrike, i cili tashmë drejton kombëtaren e Spanjës.

“Ka patur një keqkuptim të vogël, por në fund të fundit ai është një person i sinqertë, i cili t’i thotë gjërat në fytyrë dhe unë ndihem mirë me këto lloj njerëzish. Nuk më aktivizoi për një kohë të gjatë, por kur më konsideronte në formë dhe gati më jepte mundësinë të isha titullar. Mendoj se Luis Enrike është zgjedhja ideale për kombëtaren.”

Aleksis Vidal me Leon Mesin

Vidal ndalet dhe te marrëdhënia e Luis Enrikes me Zhordi Albën. Palët kishin probleme që nga koha e Barcelonës. Trajneri nuk e ka grumbulluar lojtarin me Spanjën, ndërsa Vidal ndihet keq, sepse Zhordi Alba është më i miri në rolin e tij në Spanjë.

“E di që mes tyre ekziston një raport mjaft i komplikuar dhe është për të ardhur keq, sepse po flasim për anësorin e majtë më të mirë të futbollit spanjoll”, përfundon Aleksis Vidal.

Çështja Zhordi Alba, ka risi në kampin spanjoll

Sport Ekspres — Wed, 12 Sep 2018 11:12:29 +0000

Dyert e kombëtares spanjolle janë të hapura për Zhordi Albën. Sipas mediave spanjolle rikthimi i mbrojtësit të majtë në kombëtare është thjesht çështje kohe. Luis Enrike shpjegoi se për momentin nuk e shikonte plotësisht gati ish-lojtarin e tij për projektin e ri tek “La roja”,por për asnjë moment nuk ka vënë në dyshim aftësitë e tij.

Gjithashtu, tekniku spanjoll e konsideron largimin e përkohshëm të Albas nga kombëtarja si një rritje të urisë së tij për t’u rikthyer akoma dhe më i fortë në pozicionin e tij, ku ka jo pak konkurrencë me një Markos Alonso dhe Hose Gaja goxha në formë.

Gjithsesi, Enrike nuk ka dhënë një datë fikse për rikthimin e Albas, por nga mediat spanjolle rikthimi pritet që në ndeshjet e tetorit ndaj Uellsit dhe Anglisë, ose në nëntor kundër Kroacisë dhe Bosnjës. Pra,të gjitha gjasat janë që mungesa e Zhordi Alba nuk do të jetë afatgjatë.