Në reagimin e bërë nga faqja zyrtare e klubit në “Facebook”, klubi sqaron se takimi i së mërkurës do të zhvillohet në orën 13:00 në kompleksin sportiv “Internacional” , kompleks ky ku Kukësi zhvillon stërvitjen prej disa vitesh.

POSTIMI I KLUBIT TË KUKËSIT

“Për të kaluar në fazën çerekfinale, Kukësit do i duhet të përmbysë fitoren 2 – 1 që Apolonia regjistroi në takimin e parë të zhvilluar në Fier.

Ndeshja e kthimit mes FK Kukësit dhe KF Apolonisë, takim i vlefshëm për 1/8 e Kupës së Shqipërisë, do të zhvillohet ditën e mërkurë ora 13:30 tek kompleksi sportiv “Internacional”, në Pezë Helmes.

Me gjithë dëshirën e madhe të presidentit Safet Gjici për zhvillimin e ndeshjes në stadiumin “Zeqir Ymeri”, kërkesa e Klubit tonë nuk u pranua nga Federata Shqiptare e Futbollit pasi, sipas institucionit më të lartë të Futbollit Shqiptar, stadiumi i Kukësit nuk plotëson kushtet dhe aktualisht po punohet për studimin e fizibilitetit.

Pas marrjes së kësaj përgjigje, drejtuesit e Klubit vendosën që kjo ndeshje të realizohet në kompleksin sportiv “Internacional” dhe hyrja do të jetë pa pagesë për tifozët“.

Për këtë arsye, Kukësi ka nisur punën paraprake për ndërhyrje në stadiumin “Zeqir Ymeri” dhe ndërkohë ka kontaktuar me një agjenci arkitekturore nga një studio jashtë vendit për ndërtimin e stadiumit të ri.

Klubi kampion në fuqi njofton se tashmë ka mbërritur projekti, i cili është pëlqyer nga presidenti Safet Gjici dhe drejtuesit e klubit. Projekti është i mirëstudiuar dhe ka ardhur me detaje. Stadiumi i ri do të ketë një kapacitet prej 10 mijë vendesh dhe është i mbuluar krejtësisht edhe në tribunat e tifozëve. Ky impiant kap vlerën e 3.5 milion eurove dhe do të jetë padyshim ndër më modernët në Shqipëri.

Stadiumi do të jetë një qendër multifunksionale, pasi do të përfshijë të gjitha kushtet e nevojshme për skuadrën, nga palestra etj. I njëjti komoditet do të ofrohet edhe për tifozët që do të gjejnë shërbime të ndryshme.

Mbas miratimit të buxhetit nga qeveria shqiptare do të nisë edhe ndërhyrja në stadium. Presidenti Gjici ka besim se ky projekt do të miratohet nga qeveria shqiptare. Ndërtimi i stadiumit është një e mirë për qytetin e Kukësit, pasi sjell një tjetër impakt në jetën dhe ekonominë e qytetarëve. Skuadra kampione e Shqipërisë e meriton një investim të tillë edhe për shkak të historisë që ka bërë këto vitet në futbollin shqiptar. Ky stadium mund t’i shërbejë mjaft mirë edhe vëllezërve tanë nga Kosova, që do t’i kenë dyert e hapura për zhvillimin  e ndeshjeve në kompeticionet ndërkombëtare.

Nëse realizohet, do të ishte diçka madhështore, aq më shumë nëse arrihet me koston e parashikuar, 3.5 milionë euro, që është një shifër modeste për shtetin shqiptar, sidomos po të llogaritet kostoja e jashtëzakonshme për ndërtimin e Arenës Kombëtare, pasuese e “Qemal Stafës”.

Një projekt i tillë, me këto parametra dhe kosto, nëse realizohet, do të duhej të imitohej urgjentisht nga disa klube të Superiores.