Dëshira e Kukësit rinovon, Partizanit i ikën një mbrojtës

Sport Ekspres — Sat, 05 Jan 2019 16:52:53 +0000

Merkatoja e skuadrave shqiptare është futur në fazën e nxehtë dhe të gjitha ekipet kërkojnë të përforcohen sa më shumë në këtë muaj janar. Kukësi vazhdon të mbetet “mbreti” i kësaj dritareje transferimi, me Rrocën dhe Shkurtajn që kanë nënshkruar me ekipin verilindor.

Kukësi synonte të firmoste edhe me portierin e Shkëndijës së Tetovës, Zahov, por ky i fundit ka rinovuar me ekipin kuqezi. Me kontratën e re, gardiani Zahov do të qëndrojë deri në vitin 2021 te Shkëndija, duke i thënë “jo” Kukësit.

Edhe te skuadra e Partizanit ka pasur lëvizje, me mbrojtësin Rron Statovci që është larguar nga “Demat e Kuq”. Mbrojtësi 21-vjeçar foli për “GazetaSheshi.com”, ku u shpreh: “E kam përfunduar marrëveshjen me Partizanin dhe tani jam lojtarë i lirë”.

“Oferta kam pasur edhe gjatë kohë sa isha te Partizani, por shumë shpejtë pritet të vendosi për të ardhmen time”, shtoi mbrojtësi 21-vjeçar.

Kukësi nuk di të ndalet, kërkon titullarin e Shkëndijës

Sport Ekspres — Thu, 03 Jan 2019 14:26:34 +0000

Kukësi është skuadra më aktive e merkatos së dimrit në Kategorinë Superiore. Verilindorët afruan Eduart Rrocën nga Luftëtari, ndërsa nga momenti në moment pritet dhe zyrtarizimi me sulmuesin Vasil Shkurtaj.

Por, skuadra e Armando Cungut, pritet të përforcohet edhe në repartin e mbrojtjes. Sipas “Telesport”, Kukësi është i interesuar për të sjellë në Shqipëri portierin e Shkëndijës së Tetovës, Kostandin Zahov.

Kontrata e “Gardianit” me kampionët e Maqedonisë mbaron më datë 15 janar dhe ai mund të vijë në kampionatin tonë me kosto 0. Zahov ka qenë një titullar prej dy sezonesh te Shkëndija dhe mbetet për t’u parë nëse klubi tetovar do të tentojë të nënshkrojë një marrëveshje të re me 31-vjeçarin.