Yerry Mina

Jerri Mina, një klauzolë “e çmendur” e kthen te Barcelona

Sport Ekspres — Fri, 10 Aug 2018 10:15:45 +0000

Barcelona e përdor shpesh klauzolën për riblerjen e lojtarëve që transferon në klube të tjera. Ka ndodhur me Deulofeun, i cili u shit po te Evertoni, klub që e pat huazuar sulmuesin anësor te Milani. Me kuqezinjtë shkëlqeu dhe katalanasit menjëherë aktivizuan klauzolën dhe e rikthyen në Spanjë ish-lojtarin e tyre. Pjesa tjetër e historisë, që te Barça nuk pati sërish hapësira dhe u shit në Angli tek Uatfordi, nuk është se ka ndonjë rëndësi të madhe.

Së fundmi te klubi anglez Barcelona ka shitur edhe qendërmbrojtësin Jerri Mina. Kolumbiani iu bashkëngjit Evertonit për 30.5 milionë, ndërkohë që me bonuse shifra e arkëtuar mund të shkojë në 32 milionë.

Për 23-vjeçarin ka një klauzolë për riblerjen e tij. Barcelona, nëse e sheh të arsyeshme në një moment tjetër, mund të paguajë shifrën e 60 milionë eurove dhe ta rikthejë qendërmbrojtësin në Katalonjë.

Goditje në frymën e fundit, Evertoni i befason të gjithë

Sport Ekspres — Thu, 09 Aug 2018 14:56:36 +0000

Merkatoja në Angli ka qenë intensive sot, në ditën e mbylljes së transferimeve, teksa disa klube kanë goditur në fundi. Evertoni është një nga ato ekipe që merkaton këtë verë e ka bazuar te Barcelona. Për krahun e majtë të mbrojtjes është afruar francezi Lukas Dinje nga katalanasit, ndërkohë që është mbyllur edhe transferimi i Jerri Mina te skuadra blu e Liverpulit. Kolumbiani kalon në Angli për 30.5 milionë euro, plus 1.5 milionë euro bonuse. Megjithatë, ka një problem për Evertonin: Barcelona ka vendosur në kontratën e shitjes një klauzolë që i lejon riblerjen nëse Mina ngjitet në nivelin e pritshëm.

? [LATEST NEWS] Agreement with @Everton for the transfer of Yerry Minahttps://t.co/YMyWm4thOR

— FC Barcelona (@FCBarcelona) August 9, 2018

Edhe Andre Gomesh, i cili është kërkuar nga disa klube në Spanjë dhe Uest Hemi në Angli, është zyrtarzuar tek Evertoni. Barcelona e ka dhënë në huazim për 2.5 milionë euro.

Skuadra angleze nuk e mbyll me kaq merkaton. Qendërmbrojtësi Kërt Zuma do t’i bashkohet gjithashtu Evertonit në huazim nga Çelsi. Për të është refuzuar një ofertë nga Mançester Junajtid. Ky klub ka dështuar gjithashtu të marrë edhe Minan nga Barcelona.

Goditja tjetër është ajo e Bernard, i cili ka nënshkruar me Evertonin për katër vite. Milani, Interi dhe Çelsi e donin mesfushorin brazilian. Për më tepër anglezët e kanë marrë me parametra zero, pasi i kishte përfunduar kontrata me ukrainasit e Shahtar Doneck.

Jerri Mina në Premier Ligë, detajet e marrëveshjes

Sport Ekspres — Mon, 06 Aug 2018 08:11:38 +0000

Kalimet nga Barcelona te Evertoni po kthehen në normalitet. Pas Lukas Dinje, edhe një tjetër lojtar i katalanasve pritet të vishet blu. Në fakt nuk është një surprizë, pasi prej kohësh është bërë me dije interesimi që klubi i Premier Ligës ka për kolumbianin Jerri Mina.

Pas tërheqjes së Mançester Junajtid, që nuk ishte gati t’ia plotësonte kërkesat financiare mbrojtësit, Evertoni ka nxituar dhe ka gjetur marrëveshjen për 32 milionë euro raporton gazeta spanjolle “Sport”. Parimisht është mbyllur gjithçka dhe mund të diskutohet vetëm për ndonjë detaj të vogël.

Sa i takon kontratës së lojtarit me Evertonin, gjithçka është e mbyllur. Mina për pesë vite do të jetë pjesë e skuadrës angleze, që ndryshe nga Junajtid ia ka plotësuar të gjitha kërkesat lojtarit që spikati në Rusi 2018 me Kolumbinë.

Tanimë mbetet që të zyrtarizohet marrëveshja edhe nga klubet. Mbrojtësi ishte jashtë planeve të Barcelonës dhe shitja e tij u pa si mundësia më e mirë. Katalanasit në janar e blenë 23-vjeçarin për rreth 12 milionë euro, ndërkohë që pas gjashtë muajsh arrijnë të përfitojnë 20 milionë euro.

Junajtid tërhiqet, Mina i tremb me kërkesat financiare

Sport Ekspres — Sun, 05 Aug 2018 11:37:46 +0000

Mançester Junajtid po punon për t’u përforcuar në mbrojtje dhe në listën e tyre të objektivave ishte kolumbiani i Barcelonës, Jerri Mina. Ditë më parë ka pasur një takim me menaxherin e lojtarit, Felipe Ruso. “The Sun” raporton se palët janë shumë larg mes tyre.

Kërkesat financiare të mbrojtësit kanë bërë që Junajtid të tërhiqet dhe të shohë për opsione të tjera. Mina bëri mirë në “Rusi 2018”, teksa u shfaq edhe si goleador me Kolumbinë, duke shënuar tre herë.

Junajtid po përpiqet të transferojë Tobi Aldervereld të Totenhemit, por edhe për të kërkesat janë të larta. Belgu më parë ka luajtur për Atletiko Madrid në të shkuarën dhe momentalisht kartoni i tij vlerësohet 67 milionë euro.

Sa i takon Minës, Evertoni dhe Lioni janë klubet e interesuara për të, ndërkohë që Barcelona është gati ta shesë mbrojtësin nëse ndonjë prej këtyre klubeve plotëson kërkesat e tyre financiare.