Sulmuesi i Fiorentinës, Simeone nuk shënonte në shtëpi që nga 26 gushti, në sfidën ndaj Kievos. Ai arriti t’i shënonte Empolit, por ajo që ra në sy ishte zemërimi i tij. Festa e golit nuk ishte ajo e duhura, pasi lojtari u drejtohet tifozëve të Fiorentinës me një gjestin e gishtit tek buza sikur do t’u thotë atyre: heshtni!

Shokët e ekipit u munduan të qetësonin situatën dhe ia dolën. Argjentinasi është “piketuar” nga tifozët si fajtori kryesor për krizen e rezultateve që po kalon ekipi nga Firence. Pas ndeshjes, sulmuesi është shprehur : “u kërkoj falje tifozëve, por isha  i zemëruar”. Simeone njihet nga të gjithë për karakterin e tij të vështirë. Në këtë sezon, ai ka shënuar 4 gola.

23-vjeçari është prononcuar për “Fox Sports” nga grumbullimi i kombëtares, duke “trembur” Fiorentinën. Sulmuesi ëndërron të luajë me Atletiko Madrid, në ekipin që drejtohet nga Diego Simeone, i ati i Xhovanit.

“Unë te Atletiko Madrid në një ekip me babain tim? Për momentin nuk ka asnjë mundësi. Babai im nuk më ka folur kurrë për këtë mundësi. Është diskutuar shumë, por fakti që flitet më jep mundësinë të vazhdoj të rritem. Do të ishte maksimumi për mua të luaja me Atletiko Madrid. Për të dy, babain tim dhe mua. Atletiko Madrid është diçka që e kemi brenda nesh.”

Xhovani, i cili shënoi gol me Argjentinën që në debutim kundër Guatemalës, nuk e fsheh dëshirën për ta parë një ditë babain e tij në stolin e kombëtares ”çeleste”.

“Si futbollist do të më pëlqente shumë të shihja babain tim këtu dhe kjo vlen për të gjithë argjentinasit, sepse ai është një nga trajnerët më të mirë në botë. Por, ai ma përsërit gjithmonë që nuk është momenti dhe këto nuk janë pyetje për t’u bërë. Gjyshi im më thoshte gjithmonë: ‘Një minutë me Argjentinën vlen sa një orë në një klub’. Jam shumë i lumtur që kam patur këtë mundësi dhe dua të bëj më shumë për popullin tonë”, përfundon 23-vjeçari i Fiorentinës.

Vetë Simeone ka folur për programin e Kupave (El Partizato), duke komentuar mbi fjalët e së motrës dhe të ardhmen e tij.

“Kontrata ime me Atletikon mbaron në vitin 2020, pra kam dhe dy vite kontratë. Gjithmonë e kam thënë që një ditë do të drejtoj Interin, por po jetoj një moment të jashtëzakonshëm me Atletikon. Do të ndodhë kur të ndodhë, por Inter ka një trajner, i cili po bën një punë shumë të mirë”, sqaron trajneri 48-vjeçar, i cili është aktivizuar me Interin për dy sezone gjatë karrierës si futbollist.

Simeone komenton dhe debutimin me gol me Argjentinën të djalit të tij, Xhovani Simeone. Sulmuesi i Fiorentinës shënoi në miqësoren përballë Guatemalës, ndërsa Diego tregon emocionet e përjetuara.

“Ulërita ‘gol’ dhe gruaja ime, e cila po flinte komentoi: ‘Bukur’. Më erdhi të qaj nga gëzimi, ai e di se çfarë ndjejmë për kombëtaren. Xhovani i ka të gjitha cilësitë për të luajtur për mua, por nuk do të luajë kurrë për ekipin tim. Është shumë e vështirë të kesh djalin në dhomat e zhveshjes. Gjithmonë kam menduar shumë për këtë situatë. Ai ka të gjitha karakteristikat e sulmuesit që unë preferoj. Ndoshta, kur të mos jem më trajner i Atletikos, mund të vijë të luajë këtu. Real Madrid? Hapësirat mes nesh janë zvogëluar me largimin e Kristiano Ronaldos”, përfundon Diego Simeone, trajneri i Atletiko Madrid.