Në daljen për shtyp, trajneri Alegri konfirmoi mungesën e 34-vjeçarit. Mbrojtësi nuk arriti të ishte i gatshëm as në ndeshjen e parë. Kështu “timonierit” të Juventusit do i duhet të bëjë pa një nga shtyllat e ekipit. Kielini pritet të zëvëndësohet nga Rugani, që do të bashkojë dyshen e mbrojtjes me Bonuçin.

Krahas kapitenit, trajneri Masimiliano Alegri, konfirmoi mungesën e sulmuesit kroat Mario Mandzhukiç, i cili ka shqetësime në gju, ndërsa një mungesë pa peshë do të jetë ajo mbrojtësit uruguaian Kaseres. Ndërkohë, Duglas Kosta ia ka dalë të rikuperohet në kohë.

Në mungesë të Mandzhukiç, ka shumë gjasa që Alegri t’i besoj që nga minuta e parë të riut Moise Ken.

Xhorxhio Kielini aktivizohet me Juventusin që nga vitit 2005 dhe është një nga pikat më të forta të ekipit torinez. Gjithmonë gati për të mbajtur portën e paprekur, sakrificë, karakter dhe aspak mëshirë për kundërshtarët.

Për mbrojtësin 34-vjeçar është gjithmonë njësoj, si të luash kundër Milanit, ashtu dhe ndaj Kievos. Sonte do të tentojë të ndalë Suzon dhe Higuain, por ai ka një të kaluar si milanist. E shkurtër dhe e largët. Ishte marsi i vitit 2000 dhe 16-vjeçari Kielini aktivizohej me moshat e Milanit.

Trajneri Balardini kishte vënë re një djalosh të Livornos, duke e sjellë në moshat e kuqezinjve. Ai ishte Xhorxhio Kielini dhe në ekip kishte lojtarë si Alesandro Matri, Marko Donadel, Paskuale Foxhia dhe Paolo Samarko. Ky i fundit aktivizohet me Frozinonen dhe kujton adoleshentin Kielini.

“E mbaj mend Xhorxhion kur erdhi. Ishte i trembur dhe i edukuar, si vazhdon të jetë dhe sot. Ishte i madh në trup, kishte një forcë mbinjerëzore dhe ne ishim të bindur se Milani do ta blinte. Ai ka bërë diferencën me këmbënguljen e tij. Mbaj mend një detaj, Rampanti ishte trajner jonë dhe i kërkoi Kielinit të mos e ekzagjeronte me kreativitetin: ‘Xhorxhio, dëshiron të bëhesh futbollist? Lëshoje topin para dhe vrapo’. Ai e dëgjoi dhe u bë futbollisti që është sot”, përfundon Paolo Samarko.