Merkato te Partizani, Duro ka një kërkesë për Kukësin

Sport Ekspres — Tue, 30 Jul 2019 12:18:20 +0000

Shpëtim Duro është vënë në kërkim të një portieri për Kukësin. Largimi i Stivi Frashërit nga verilindorët ka bërë që opsioni i vetëm në këtë repart të jetë “gardiani” Ilir Avdyli. Trajneri kryeqytetas ka piketuar kandidatin ideal për t’i bërë konkurrencë portierit nga Kosova.

“sportekspres.com”, mëson se Duro kërkon të marrë te Kukësi portierin e Partizanit Dashamir Xhika. 30-vjeçari është pjesë e kryeqytetasve prej pesë sezonesh, madje është pikërisht Duro ai që riktheu Xhikën te Partizani në verën e vitit 2014.

Pas pesë vitesh me aktivizime të pakta te Partizani, Xhika mund të gjejë të Kukësi një mundësi për një vend titullar, çka nëse ndodh do rriste ndjeshëm vlerën e tij në tregun e portierëve shqiptarë.

Xhika: Partizani është shtëpia ime, dua ta mbyll këtu karrierën

Sport Ekspres — Thu, 22 Nov 2018 12:33:26 +0000

Dashamir Xhika ka qenë i pranishëm në daljen për shtyp që i paraprin takimit të Partizanit ndaj Flamurtarit në Vlorë. Gardiani kryeqytetas do ta nisë nesër nga minuta e parë në mungesë të të dëmtuarit Alban Hoxha. Para gazetarëve Xhika u shpreh se klubi i Partizanit është shtëpia e tij dhe shpreson që ta mbyllë karrierën aty.

NDRYSHIMI NGA SEZONET E MËPARSHME “Është e vërtetë që është pak ndryshe nga vitet e tjera. Trajneri ka futur një frymë të re në ekip. Në ndryshim nga të tjerët para tij ai nuk ka vënë në presion. Unë jam rritur te Partizani dhe shpresoj ta mbyll karrierën time këtu”.

VLERËSIMI NGA TIFOZËT – “Besoj se ka të bëjë shumë dhe eksperienca. Nuk jam më një djalosh i ri si dikur. Stërvitem mirë së bashku me Albanin (Hoxha). Shpresoj që dhe nesër të jap maksimumin”.

GJITHMONË ZGJEDHJE E DYTË – “Për mua nuk është problem, qoftë portieri i dytë apo i tretë”.

LARGIMI NGA PARTIZANI? – “Nuk kam menduar të largohem. Partizani është shtëpia ime. E kam thënë disa herë që për mua nuk është problem të qenit portier i dytë. Kemi një portieri cilësor si Albani, i cili është dhe pjesë e kombëtares”.

KA FILLUAR TË NDIHET DERBI ? – “Akoma jo, jemi të fokusuar te ndeshja e Flamurtarit. Nesër jam në fushë, ndërsa derbi është javës tjetër”.