Xhengiz Ynder

Bajern i paraprin të ardhmes, dy supertalente në orbitën e bavarezëve

Sport Ekspres — Mon, 08 Jul 2019 18:27:11 +0000

Bajerni i Mynihut këtë vit është detyruar të ndërrojë strategjinë e klubit mbi merkaton, duke bërë blerje të mëdha me harxhime kolosale. Kjo ndoshta ka ndodhur edhe me humbjen e aftësisë për të zbuluar yje të rinj që pritet të shpërthejnë. Në Bavari e kanë kuptuar këtë dhe po punojnë për të sjellë talentet më cilësorë.
Xhengiz Ynder i Romës është një emër që pëlqehet shumë nga Rumenige. Turku ka treguar aftësi shumë të mira te Roma. Paraqitjet pozitive kanë bërë që vlera e kartonit të tij të shkojë në 35 milionë euro. Bajern po nxiton ta marrë para se çmimi i 21-vjeçarit të “prekë” qiellin.

Një tjetër objektiv i drejtuesve të Bajern është edhe Benxhamin Henriks. Mbrojtësi ka spikatur shumë te Monako dhe Bajern synon të blejë shërbimet e tij. 22-vjeçari mbulon të dy krahët e repartit difensiv, por nuk e ka aspak problem edhe aktivizimin në mesfushë. Djaloshi spikati në Europianin e të rinjve me kombëtaren e Gjermanisë. Vlera e tij në merkato vërtitet rreth 20 milionë eurove.

Të gjithë pas Ynder, tani Roma i vë edhe çmimin

Sport Ekspres — Fri, 26 Oct 2018 09:04:56 +0000

Xhengiz Ynder ka rreshtuar në dyert e Romës katër klube “big” që duan shërbimet e mesfushorit me tipare sulmuese. Bajerni i Mynihut dhe Arsenali prej kohësh ishin vënë në ndjekje të 21-vjeçarit, por tanimë lista e klubeve që e duan është më e gjatë.

Së fundmi interesim për ynder kanë shfaqur edhe Barcelona me Mançester Siti. Gjërat janë serioze dhe sipas “Corriere dello Sport” Roma tashmë duket se i kanë vënë edhe një çmim: 50 milionë euro. Në verë largimi i futbollistit turk duket i pashmangshëm.

Momentalisht te Roma ai merr më pak se 1 milion euro dhe palët në fakt kanë nisur bisedimet për rinovimin e kontratës. Menaxheri Fali Ramadani është në gjendje ta “rehatojë” klientin e tij dhe po shqyrton të gjitha opsionet.

Rinovimi i kontratës me Romën kishte ngecur te klauzola e largimit. Ynder nuk dëshiron që në kontratë të përfshihet një vlerë që klubet e tjera të mos e paguajnë dot. Minimalisht 50 milionë kërkojnë verdhekuqtë të jetë klauzola për 21-vjeçarin. Vera pritet të sjellë të reja për Ynder.

Xheko pranë akordit, rinovimi i Ynder “peng” i një klauzole

Sport Ekspres — Thu, 18 Oct 2018 09:23:53 +0000

Xhengiz Ynder ka marrë një ofertë për kontratë të re nga Roma. Mesfushori i avancuar, i blerë nga Bashakshehir, zhvilloi një sezon të mirë vjet dhe klubi italian ka menduar t’ia shpërblejë disi. I blerë për rreth 14 milionë euro, Ynder paguhet më pak se 1 milion euro në sezon.

Menaxheri Fali Ramadani po bisedon prej kohësh me klubin italian, por sipas asaj që raporton “Gazetta dello Sport” ka mbetur gjithçka te klauzola e largimit. Ynder kërkon që të vendoset një shifër që të mos e nxjerrë atë nga tregu.

Sikurse kuptohet, dëshira e tij është që të largohet nëse një klub i madh e do dhe është i gatshëm të paguajë për të. Së fundmi është lakuar si klub i interesuar Bajerni i Mynihut. Kontrata aktuale e Ynder me Romën përfundon në fund të qershorit të vitit 2022.

RINOVIMI ME XHEKON – Edin Xheko është një tjetër lojtar me të cilin Roma po bisedon për rinovimin e kontratës. Sulmuesi boshnjak ka oferta nga disa klube, ndërkohë që nga ana tjetër verdhekuqtë po shohin edhe për një pasues të tij.

Boshnjaku është tashmë 32-vjeç, por kjo se ka ndalur Romën t’i ofrojë një kontratë të re deri në vitin 2021 sulmuesit. Sipas “Gazetta dello Sport” në javët e ardhme pritet të mbyllet gjithçka me sukses dhe palët të zyrtarizojnë bashkëpunimin edhe për tre vitet e ardhshme.

TË DËMTUARIT – Roma humbet dy lojtarë për shkak dëmtimesh. Diego Peroti, mesfushori i verdhekuqve, ka pësuar një dëmtim që do ta lërë jashtë fushave të blerta për të paktën tre javë. Edhe Rik Karsdorp, mbrojtësi i majtë, do të duhet të pushojë për disa ditë. Mjekët i kanë rekomanduar të qëndrojë për rreth 10 ditë larg fushave të blerta.

Gjatë 3-4 javëve të ardhshme Roma do të ketë disa ndeshje, teksa do të përballet me Spal, Napolin, Fiorentinën dhe Sampdorian në kampionat. Gjithashtu do të luajë në Champions kundër CSKA-së së Moskës.

Talenti i Romës oferta nga Gjermania, Bajerni e ka seriozisht

Sport Ekspres — Sun, 07 Oct 2018 17:35:18 +0000

Xhengiz Yndër është një nga lojtarët më të talentuar të Romës dhe klubi po punon për t’i rinovuar kontratën 21-vjeçarit. Lojtari ofensiv ka si menaxher shqiptarin Fadi Ramadani, i cili vazhdon negociatat me klubin kryeqytetas për rinovimin e Ynder, i cili pëlqehet shumë në Gjermani.

Borusia Dortmund dhe Bajerni i Mynihut janë vënë në ndjekje të lojtarit të Romës. Bavarezët e shohin si pasardhësin e Arjen Roben, të cilit i skadon kontrata në verën e ardhshme.

Siç citon “Corriere dello Sport”, gjigantët gjermanë të Bajernit janë gati për të paguar më shumë se 60 milionë euro për shërbimet e Xhengiz Ynder. Flasim për merkaton e ardhshme, aty ku klubi bavarez do të nisë sulmin për të transferuar turkun në Mynih.

Fali Ramadani bind Romën, Ynder milioner me kontratën e re

Sport Ekspres — Sat, 15 Sep 2018 09:25:50 +0000

Xhengiz Ynder vetëm pas një viti te Roma do të nënshkruajë kontratë të re, kushtet e së cilës sigurisht që do ta kënaqin sulmuesin turk. Aktualisht ai përfiton më pak se 1 milion euro, ndërkohë që tanimë të ardhura për të minimalisht do dyfishohen.

Roma shpenzoi verën e shkuar rreth 14 milionë euro për ta blerë Ynder te Bashakshehiri, ndërkohë që kontrata e re e sulmuesit do të zgjatë deri në vitin 2023. Momentalisht ajo vlen deri në verën e vitit 2022.

Monçi dhe menaxheri Fali Ramadani e kanë gjetur gjuhën e përbashkëts shkruan Corriere dello Sport. Tanimë mbetet vetëm të zyrtarizohet marrëveshja e re. Përfitimet e Ynder shkojnë në 1.8 milionë euro në sezon, ndërkohë që në kontratë përfshihen edhe bonuse nga të cilat sulmuesi arkëton edhe më shumë të ardhura.

Ynder: U rrita pas janarit, eliminimi i Barçës na jep “kredit” në Europë

Sport Ekspres — Sat, 15 Sep 2018 07:57:05 +0000

Xhengiz Ynder është një nga talentët e Romës dhe futbollit turk. Sulmuesi anësor 21-vjeçar është shpallur në vendin e tij, lojtari me rritjen më të madhe në Europë. Ynder është pjekur si njeri, është i karikuar, gati për të shënuar golin e parë në Serinë A dhe për të luajtur në Champions, aty ku Roma përballet në mesjavë me kampionët e Realit të Madridit.

Forma – “Ata që luajnë me kombëtaren rikthehen më të karikuar se më parë. Jam i qetë, kalova mirë me shokët e skuadrës dhe pashë disa miq, të cilët nuk i shihja prej kohësh. Që nga janari, unë jam një tjetër person. E thashë pasi i shënova Veronës, që do të isha një tjetër njeri. Më pas shënova tetë gola dhe ndihem krenar. Mezi po pres të shënoj golin e parë në këtë sezon, të dielën luajmë përballë Kievos dhe duam të marrim tre pikët.”

Goli më i bukur – “Ai që i shënova Shaktarit ka qenë më i bukuri, por i bukur ishte dhe goli kundër Veronës. Por, goli më i rëndësishëm mbetet ai që shënova në çerekfinalet e Champions.”

Real Madrid – “Vjet në ndeshjen e kthimit përballë Barcelonës arritëm një rezultat, që nuk e priste askush. Mendoj që jo vetëm Reali, por të gjithë do të kenë më shumë respekt për Romën. Unë po Bejl më i shpejtë? Sigurisht, që Bejl.”

Turqia – “Jam ndër pesë lojtarët turq, të cilët luajnë jashtë vendit. Jam i lumtur dhe ky ka qenë gjithmonë objektivi im. Historia ime europiane vazhdon dhe dua të arrij sa më lart.”