Gol fitoreje për Xhejmsin, vetëm barazim për Manajn e Mavrajn

Sport Ekspres — Sun, 14 Apr 2019 14:24:09 +0000

Gabala siguroi një fitore në transfertë kundër vendit të fundit. Ekipi i Sabien Lilajt (nuk ishte në formacion) dhe Xhejms Adeni mposhtën Keshlen me rezultatin 1-2. Ishte nigeriani, ai që zhbllokoi ndeshjen dhe hapi serinë e golave në minutën e parë të pjesës së dytë.

Goli i nëntë në kampionatin azerbajxhanas për 26-vjeçarin, i cili ndodhet në vendin e tretë në renditjen e golashënuesve më të mirë. Kjo fitore e ngjit Gabalën në vendin e katërt me 33 pikë, dy më pak se Sabaili i vendit të tretë.

Albasete e Rei Manajt nuk shkoi më shumë se një barazim në shtëpi kundër Elkes. Vendasit po udhëhiqnin deri shtatë minuta nga fundit, por Kastro barazoi rezultatin dhe ndeshja përfundoi 1-1. Sulmuesi lushnjar u hodh në fushë nga trajneri Ramis në minutën e 85’.

Mërgim Mavraj vazhdon të jetë i dëmtuar, ndërsa Ingolshtadi u ndal në barazim në shtëpi. 1-1 përfundoi përballja kundër Holstein Kiel, që garon për një vend në elitë. Vendasit renditen në vendin e parafundit me 23 pikë, shtatë pikë larg zonës së qetë dhe katër larg zonës “play-out”.

VIDEO | Gola “made in Nigeria”: Xhejms nuk ndalet, 3 minuta mjaftojnë për Olainkën

Sport Ekspres — Sat, 24 Nov 2018 15:43:20 +0000

Xhejms Adeni nuk ndalet dhe gjen golin e 6 në kampionat. 25-vjeçari nigerian ishte autori i golit të parë të Gabalës në fitoren 1-2 kundër Keshlas në transfertë. Ish-sulmuesi i Skënderbeut dhe Laçit shënoi në minutën e 17, duke kaluar Gabalën në avantazh. Titullar ishte dhe Sabien Lilaj, i cili u aktivizua gjatë gjithë ndeshjes. Ky trepikësh e ngjit Gabalën në vendin e pestë me 15 pikë.

Tre minuta i kanë mjaftuar Pitër Olainkës të shënojë gol. Sulmuesi nigerian shënoi golin e tretë për Sllavian e Pragës, duke vulosur fitoren 1-3 në transfertë përballë Karvinës. 23-vjeçari u fut në fushën e lojës në minutën e 72, ndërsa tre minuta më pas gjeti golin. Olainka shfrytëzoi një pasim të Sikorës dhe nga brenda zonës mposhti portierin, duke gjetur golin e tretë në kampionatin çek. Sllavia vazhdon kryesimin në kuotën e 40 pikëve, katër më shumë se Viktoria Plzen e vendit të dytë.

Fitore ka arritur dhe CSKA Sofia e Ali Soue. Vetëm 7 minuta lojë për ish-sulmuesin e Skënderbeut, i cili u hodh në fushë në minutën e 83. Ky trepikësh e ngjit CSKA-në në vendin e dytë me 38 pikë. Po qa ka dhe Ludugoreci kryesues, por që ka për të zhvilluar një ndeshje më shumë.