“Objektivi im është të bëhem një titullar i Romës në këtë sezon. Nuk pres të luaj në çdo ndeshje, por besoj se jam pjesë e planeve të trajnerit. Po mësoj shumë dhe po përpiqem të përshtatem me një stil tjetër futbolli nga ai që luaja me Ajaksin.

Nuk ndihem as një sulmues i parë, as një sulmues i dytë, por pak nga të dyja. Këtu po bëhem një futbollist më i kompletuar. Në stërvitjet me Ajaks shënoheshin nga 6 gola, ndërsa këtu shënohen vetëm dy. Kjo ndodh, sepse ka shumë ekuilibër dhe të gjithë duan të fitojnë.

Di Françesko preferon të më vendosë afër sulmuesit të parë. Duhet të jesh i fortë pa top dhe të nisesh me shpejtësi, sapo arrin ta marrësh atë. Po punoj shumë dhe arrij ta izoloj veten nga fjalët që qarkullojnë, sepse unë dua vetëm të luaj në fushën e blertë. Roma është një klub i mirë dhe luajmë dhe në Champions. Do të ishte diçka shumë e veçantë nëse do të përballesha me Ajaksin në këtë kompeticion”, përfundon 19-vjeçari i Romës.

Nga ana tjetër, klubi po punon për të piketuar lojtarët e duhur për merkaton e janarit. Dy janë objektivat e drejtorit sportiv, spanjollit Monki: Iago Maidana dhe Hektor Herrera.

I pari është 22 vjeç, brazilian, luan në rolin e mbrojtësit dhe aktivizohet me Atletiko Minieron. Maidana kushton 5 milionë euro, ndërsa mesfushori Herrera nuk ka rinovuar kontratën me Porton dhe Monki mund të nisë sulmin për shërbimet e 28-vjeçarit meksikan.

Siç citon “Gazzetta dello Sport”, kreu i klubit roman i ka bërë një premtim të veçantë holandezit: “Nëse shënon 10 gola, do të dhuroj një makinë”. Palota kishte menduar një Mercedez të bukur për Klaivert, por duke parë shpërthimin e talentit, i cili bëri një ndeshje shumë të mirë me Torinon, madje asistoi në golin e Xhekos, tashmë nuk flitet më për Mercedez, por për një “Lamborghini”.

Diçka e vështirë për një debutues të arrijë në shifrën e 10 golave që në sezonin e parë, por Palota kërkon të jetë gati. Klaivert e ka nisur në mënyrën më të mirë dhe nëse arrin shifrën e 10 golave, atij do t’i dorëzohen çelësat e makinës.

“Zgjodha Romën pasi doja të ndryshoja ambient dhe jam i lumtur nga zgjedhja e bërë. Preferoj të shënoj gola, por edhe të jap asiste për shokët e mi, diçka tepër e rëndësishme për një sulmues krahu. Pika ime më e fortë? Jam i ri dhe mund të përmirësohem. Kam zgjedhur numrin 34 në nder të një mikut tim, i cili ka pësuar një incident të rëndë në kokë”.

Holandezi flet dhe për ish-ekipin e tij, barrën e një emri të madh (Xhastin është djali i ish-sulmuesit të famshëm, Patrik Klaivert), golin më të bukur, por edhe për hollandezët e tjerë që luajnë me Romën.

“Me Ajaksin kalova një eksperiencë të bukur. Kam luajtur me moshat e ekipit, për të arritur deri në nivele të larta. Babai im ka zhvilluar një karrierë të madhe dhe nuk e kam të thjeshtë të krahasohem më të, por nuk e ndjej presionin. Ai më këshillon shpesh dhe më duhet ta dëgjoj dhe ndihem me fat për diçka të tillë. Golin më të bukur deri më tani e kam shënuar përballë Tuentes me një gjuajtje nga larg.

Strotman dhe Karsdorp më kanë pritur mirë dhe është diçka e bukur të mbështetem tek ata. Ndihem krenar që kam veshur bluzën e Romës, pasi shumë pak holandezë kanë luajtur më parë me ngjyrat e Romës.”