52-vjeçari zbulon momentin kur Sarri e telefonoi për t’i ofruar bashkëpunimin e tij. Zola nuk e priste një gjë të tillë, madje kujtoi se dikush po tallej me të. Pasi u bind që në anën tjetër të telefonit ishte Sarri, Zola nuk vonoi shumë për të kthyer përgjigje pozitive.

“Nuk njiheshim më parë, kishim folur disa herë në telefon, folëm dhe kur e intervistova për në një televizor në Itali, por nuk kemi folur më parë për futboll. Ishte një surprizë për mua të përfundoja, duke punuar me Sarrin. Kur më mori në telefon, isha në shtëpi dhe mendova se dikush po tallej me mua. Për pak po e mbyllja telefonin, isha i befasuar, nuk e prisja një gjë të tillë. Sarri më shpjegoi nëse ekzistonte kjo mundësi, më pyeti nëse isha i interesuar dhe iu përgjigja: ‘jam gati, erdha’.”

“Me të vërtetë, një surprizë e madhe për mua”. Niveli i detajeve që studion dhe mënyra e tij e punës janë absurde. Nuk i lë asgjë rastësisë, mendon gjithmonë për gjithçka dhe e lexon mirë ndeshjen. Lojtarët e tij e dinë mirë se çfarë duhet të bëjnë në fushën e blertë”, përfundon Xhanfranko Zola për “Soccer AM”.

Ai sqaron faktin që po mëson shumë dhe Sarri i ka hapur një botë të madhe të këndvështrimit të lojës më popullore në botë, ndërsa komenton dhe formën e shkëlqyer të Eden Hazard, por Zola mendon që belgu mund të arrijë dhe më lart me kualitetin që zotëron.

“Mendoja që e njihja mirë futbollin, por Mauricio ka hapur një botë të madhe para meje. Për mua është gjithçka e re dhe kjo është një eksperiencë e madhe. Hazard? Nuk mendoj që Eden ka arritur potencialin e tij të plotë. Mendoj që mund t’i përdorë cilësitë e tij në një mënyrë më të mirë. E besoj me të vërtetë. Mendoj që këtë vit skuadra, në veçanti Sarri, do ta ndihmojë Hazardin të arrijë potencialin e tij të plotë”, përfundon ndihmësi i trajnerit Sarri.