Vrsaljko

Inter i “gjymtuar” ndaj Frozinones, e pëson një tjetër lojtar

Sport Ekspres — Thu, 22 Nov 2018 15:15:54 +0000

Interi do të presë të shtunën në “San Siro” Frozinonen e vendit të parafundit. Fitorja është detyrim për zikaltrit, por kjo ndeshje vjen me disa problematika për trajnerin Spaleti, i cili s’do të ketë të gatshëm të paktën tre lojtarë për takimin e fundjavës.

Dy mbrojtësit e krahut Vërsajlko dhe Dalbert kanë pësuar dëmtime në muskuj dhe s’do të jenë në dispozicion të trajnerit toskan. Mungesa e tretë për zikaltrit do të jetë mesfushori kroat Marcelo Brozoviç, i cili plotësoi numrin e kartonëve të verdhë gjatë takimit të fundit ndaj Atalantës.

Mbas ndeshjes së të shtunës, Interi do të bëhet gati për transfertën e “ferrit” në Londër ndaj Totenhemit, takim që do të zhvillohet ditën e mërkurë. Një barazim në “Wembley” do t’a bënte kualifikimin në fazën tjetër të Champions-it një mision thuajse të kryer.

Vërsajlko i pafat, diagnoza e dëmtimit frikëson Spaletin

Sport Ekspres — Mon, 19 Nov 2018 18:14:44 +0000

Ndeshjet e kombëtareve kanë sjellë jo pak lajme të këqija për një numër të lartë ekipesh nëpër Europë. Trajneri i fundit që ka marrë një lajm të keq është Luçiano Spaleti, i cili do i duhet të bëjë disa kohë pa mbrojtësin e krahut të djathtë Shime Vërsajlko.

Kroati pësoi një tërheqje muskulore gjatë ndeshjes kundër Anglisë. Kohëzgjatja e saktë e periudhës së riaftësimit do të merret vesh pas analizave të mëtejshme, por mediet italiane janë të sigurta se mbrojtësi do t’i duhen minimumi 6 deri 8 javë për t’u rikthyer në dispozicion të Spaletit.

Në mungesë të Vërsajlkos, teknikut të zikaltërve do i duhet t’i besojë krahun e djathtë të mbrojtjes Danilo D’Ambrozios. Ndërkohë, duhet përmendur se Interi do të ketë një kalendar “ferri” në muajin dhjetor ku do i duhet të përballet në harkun e pak ditëve ndaj Totenhemit, Romës, Juventusit, PSV-së dhe Napolit.

Kroacia me mungesa, dy lojtarë të Interit tërhiqen nga grumbullimi

Sport Ekspres — Tue, 09 Oct 2018 11:27:27 +0000

Kampionatet në Evropë do të kenë disa ditë pushim, pasi është radha e ekipeve kombëtare për të zbritur në fushë. Ndeshjet që do të luhen do të jenë të vlefshme për turneun “UEFA Nations League” si dhe do të ketë miqësore të shumta.

Kombëtarja e Kroacisë do të luaj një ndeshje mjaft të rëndësishme në Ligën e Kombeve përballë Anglisë së Gareth Sauthgejt. Kroatët për këtë ndeshje do të kenë dy mungesa të rëndësishme. Bëhet fjalë për dyshen e Inerit, Vërsaljko dhe Brozoviç, të cilët me sa duket janë tërhequr nga grumbullimi i kombëtares për këto ndeshje dhe nuk do të jenë në dispozicion të trajnerit Daliç.

Kroacia vjen pas humbjes shokuese në fushën e Spanjës, në shifrat tenistike 6-0. Dueli ndaj kombëtares së “3 luanëve” vjen pas gjysmëfinales së Kupës së Botës, ku ekipi kroat triumfoi në kohën shtesë 2-1, për të shkuar drejt finales së madhe, ku dhe u mund nga Franca.

San Siro i mbushur plot, Interi pa dy titullarë

Sport Ekspres — Mon, 17 Sep 2018 18:33:57 +0000

Interi është gati për ndeshjen e nesërme me Totenhemin në shtëpi. Trajneri Luçiano Spaleti nuk do ta ketë të plotë ekipin për këtë takim, pasi dy prej titullarëve të rëndësishëm kanë probleme dëmtimesh.

Nuk është rrezikuar me Lautaro Martinez. Argjentinasi ka pësuar një dëmtim që e la jashtë për ndeshjen me Parmën, ndërkohë që u raportua edhe më parë se është në dyshim për takimin me Totenhemin.

Nuk mund të rrezikohej me të, pasi hematoma nuk i kishte kaluar plotësisht dhe mjekët kanë menduar ta lënë të rikuperohet plotësisht, pasi do të pësonte ndonjë dëmtim më të rëndë që do e linte për një kohë më të gjatë jashtë fushave të blerta. Jashtë për këtë takim është edhe mbrojtësi kroat Vërsaljko.

LOJTARËT E GRUMBULLUAR PËR NDESHJEN ME TOTENHEMIN

Portierë: Handanoviç, Padelli, Berni;
Mbrojtës: De Vrij, Ranokia, Asamoah, Miranda, D’Ambrosio, Shkriniar;
Mesfushorë: Veçino, Nainggolan, Borja Valero, Brozoviç;
Sulmues: Ikardi, Keita Balde, Politano, Perishiç, Kandreva.

ATMOSFERA – Tifozët zikaltër, edhe pse u mposhtën së fundmi në shtëpi nga Parma në kampionat, kanë nxituar të blejnë biletat për ndeshjen me Totenhemin. Janë shitur plot 62500 bileta – në këtë shifër përfshihen edhe 200 biletat për miqtë – dhe kanë mbetur edhe një numër i vogël në shitje.

20 minuta në Spanjë, Vrsaljko fut në ankth Interin

Sport Ekspres — Tue, 11 Sep 2018 20:40:32 +0000

Ndërprerja e kampionatit ka lejuar Interin të punojë për të gjetur defektet e javëve të para të kampionatit, por trajneri Spaleti ka humbur shumë titullarë për shkak të grumbullimit me kombëtaret dhe natyrisht shpreson që të gjithë të kthehen në formë të plotë fizike.

Megjithatë, sot një lajm i keq ka ardhur nga mbrojtësi Shime Vrsaljko, sepse mbrojtësi kroat është dëmtuar në sfidën e Nations League kundër Spanjës.

Anësori i djathtë u zëvendësua pas 20 minutash lojë dhe u duk dëmtim serioz në gju, por natyrisht priten kontrollet mjekësore.

Vrsaljko është një ndër blerjet më të rëndësishme të verës për Interin, por ka luajtur vetëm një ndeshje nga minuta e parë për zikaltrit dhe ende nuk është kthyer në formë të plotë fizike.

Vërsaljko në Itali? Simeone “i pret krahët” Interit

Sport Ekspres — Sun, 29 Jul 2018 12:04:27 +0000

Shime Vërsaljko është një nga objektivat kryesore të merkatos së Interit. Mbrojtësi i djathtë i Atletiko Madrid kërkohet nga Luçiano Spaleti, ndërkohë që një favor për të është fakti që e njeh mjaft mirë kampionatin italian, pasi është aktivizuar në të shkuarën tek Xhenoa dhe Sasuolo.

Por nga ana tjetër Atletiko Madrid nuk dëshiron t’i humbasë shërbimet e kroatit. Pas Botërorit të mirë të bërë, trajneri Diego Simeone është treguar i qartë kur është pyetur për të ardhmen e Vërsaljko. Mbrojtësi i djathtë ka kontratë deri në vitin 2022.

“Jemi shumë të kënaqur nga Shime. Ai bëri një paraqitje të mirë në Kupën e Botës, duke treguar aftësitë e tij edhe në fazën ofensive, ku edhe ishte vendimtar. E presim me 6 gusht dhe më pas do të shohim. Jemi të lumtur për atë që ka dhënë, shpresojmë të vazhdojë me ne, pasi është një futbollist i rëndësishëm”, është shprehur për mediat spanjolle tekniku argjentinas.

“FFP” sërish makth për Interin, pista Vrsaljko drejt rënies

Sport Ekspres — Sat, 14 Jul 2018 15:57:56 +0000

Klubi zikaltër ka përforcuar thuajse të gjitha repartet e mundshme, por situata në krahun e djathtë të mbrojtës mbetet alarmante. Largimi i Zhoao Kanselos ka bërë që drejtuesit e Interit të kërkojnë urgjentisht një mbrojtës cilësor. Kroati i Atletiko Madrid, Shime Vrsaljko, është për momentin lojtari më i përfolur.Çmimi që klubi spanjoll ka vendosur për kartonin e tij është 30 milionë euro, një shumë kjo që kinezët e Suning janë të gatshëm ta paguajnë. Por ka një problem!

Sipas medieve italiane, Interi është i gatshëm ta transferojë lojtarin vetëm më anë të një marrëveshje “huazimi me blerje të detyruar” në fund të sezonit, diçka kjo që nuk pranohet kurrsesi nga spanjollët.

Ky kufizim i financave të Interit vjen si pasojë e rregullave të “Financial Fair-Play”. “FFP” është kthyer në një makth prej vitesh për klubin zikaltër. Nëse tek Atletiko nuk do të ndryshojnë mendje, vëmendja pritet të kalojë te mbrojtësi i Çelsit Davide Zapakosta, i cili nuk është në planet e trajnerit të ri të londinezëve, Mauricio Sarri.