Vojçev Shezni

Juve strategjike, ka një plan për të rrëmbyer yllin e Milanit

Sport Ekspres — Tue, 02 Jul 2019 15:26:48 +0000

Është fakt i zbardhur prej kohësh që Juventus pëlqen Donarumën. Gjithsesi, “Zonja” ka qenë tërhequr nga interesi i saj për djaloshin kuqezi, duke parë rrogën e lartë që ka në Milano dhe praninë e portierëve si Shezni dhe Perin në “Allianz Stadium”.
Mediet italiane raportojnë se Paratiçi dhe Nedved do hyjnë përsëri në garë për të sjellë Donarumën në Torino. “Sport Mediaset” shprehet se Juventus ka gati strategjinë për të materializuar këtë operacion. Milani ka nevojë për të ardhura dhe e ka nxjerrë në shitje gardianin. Shezni mund të niset drejt Parisit për të qenë portieri kryesor i PSG. Perin do të zëvendësojë Donarumën në Milano, plus një shumë parash.

Largimi i dy portierëve të Juves i hap rrugë ardhjes së Donarumës dhe Bufon në Torino. Një strategji mjaft e ndërlikuar. Për portierin e kombëtares italiane interesohet PSG, të cilët kanë gati ofertën. Areola plus 20 milion janë gati për të bindur Milanin. Vështirësia tjetër e këtij operacioni qëndron tek dëshira e Perin dhe Shezni për të lëvizur drejt destinacioneve që mendon Paratiçi.

Në lidhje me Donarumën, do të ishte një kënaqësi zbarkimi në Torino, duke qenë se do mësonte prej Xhixhi Bufon. Në pamje të parë duket një operacion tepër i ndërlikuar, por kjo merkato ka treguar se asgjë nuk është e paarritshme, sidomos nëse flasim për Juventusin.

Shezni: Hleb i varur nga alkooli, Nasri mendonte se ishte gangster

Sport Ekspres — Fri, 22 Mar 2019 09:34:11 +0000

Portier i Juventusit, Vojçev Shezni, ka qenë pjesë e një emisioni në “YouTube”, ku ka folur në lidhje me disa nga ish-kolegët e tij te skuadra e Arsenalit.

Komentet më interesante ishin ato për bjellorusin Aleksandër Hleb dhe francezin Samir Nasri. I pari kishte probleme me varësinë nga alkooli, ndërsa i dyti kishte një karakter aspak të pëlqyeshëm.

HLEB – “Mund të kishte arritur shumë më shumë gjëra në futboll. Kishte përpara vetes një karrierë të madhe, por i pëlqente të konsumonte shumë alkool”.

Hleb

VAN PERSI – “Ishte një lojtar jashtëzakonisht shumë arrogant. Zgjodhi të shkonte te Mançester Junajtid ku fitoi një titull, por vetëm aq. Më pas përfundoi në Turqi dhe karriera e tij e madhe mori fund. Jam i sigurt se do të kishte arritur më shumë gjëra tek Arsenali”.

NASRI – “Ai ishte ndër ata tipat që mendonte sikur ishte ndonjë gangster. Çdokush ka njohur tipa të tillë në shkollë, tipa që kishin disa shokë të mëdhenj dhe kjo nuk është gjë e bukur”, përfundoi Shezni.

Kritika nga Anglia: Juventusi ta harrojë “Champions”-in me… Sheznin në portë!

Sport Ekspres — Thu, 08 Nov 2018 16:17:39 +0000

Kur i hedh një sy Juventusit dhe kontingjentit të lojtarëve, dallohet thjeshtë që pika më pak cilësore e ekipit është portieri. Polaku Shezni është një portier i mirë, por nuk jep sigurinë e dikujt që është tepër e vështirë t’i shënosh.

Roli i portierit është specifik dhe mjafton një gabim për ta “kryqëzuar”. Shezni u shfaq i pasigurt në golin e dytë të Junajtid në humbjen e mbrëmshme me rezultatin 1-2 dhe në drejtim të tij kanë ardhur kritika nga vendi ishullor.

Pol Skolls dhe Ouen Hargrivs, ish-mesfushorë të “Djajve të Kuq”, kanë cilësuar Sheznin si pikën më të dobët të bardhezinjve të Alegrit.

“Mendoj se Shezni nuk e bëri mirë punën e tij. Mund të dilte, por ishte i pasigurt dhe mendoj se portieri është pika më e dobët e Juventusit. Ka vuajtur për pesë vite tek Arsenali dhe nuk më duket se është përmirësuar”, flet Pol Skolls për “BT Sport”, duke iu referuar autogolit të Aleks Sandros, që solli fitoren e Junajtid.

Në të njëjtën linjë qëndron dhe Hargrivs, megjithëse gabon pak në arsyetimin e tij, pasi kemi dhe rastin e Barcelonës, që ka fituar tre Champions Liga me një portier si… Viktor Valdez, padyshim jo një portier i nivelit botëror.

“Skolls e preku çështjen e portierit. Sa skuadra e kanë fituar Champions Ligën pa një portier të nivelit botëror? Juventus është përgatitur të fitojë Champions-in dhe njerëzit prapa skenave po mendojnë se e kanë humbur shanset, tani që Bufon është larguar”, përfundon Ouen Hargrivs.