Visar Musliu

Dorëzohet Shkëndija, shet “yllin” e saj për 500 mijë €

Sport Ekspres — Mon, 05 Aug 2019 09:34:13 +0000

Shkëndija e Tetovës synonte grupet e Europa League dhe para ndeshjeve në Europë refuzoi të lëshonte disa prej lojtarëve kryesorë. Një prej tyre ishte mbrojtësi Visar Musliu, i cili pati një ofertë nga Mol Vidi, që ofroi 500 mijë euro referuar mediave në Maqedoninë e Veriut.

Tashmë tetovarët janë dorëzuar dhe kanë pranuar ta shesin një prej lojtarëve më të mirë të tyre. Musliu iu bashkua Shkëndijës në shkurt të vitit 2018, duke i bërë një “rreng” Vardarit. Mbrojtësi kishte një klauzolë që e linte të lirë për t’u transferuar jashtë vendit dhe firmosi te Prishtina. Bardhekaltrit më pas e huazuan te Shkëndija, ku regjistroi dy sezone mjaft të suksesshme.

NJOFTIMI – Shkëndija dhe MOL Fehervar FC kanë arritur marrëveshje për transferimin e mbrojtësit Visar Musliu në radhët e kampionëve të Hungarisë. 24-vjeçari do të firmosë kontratë me MOL Fehervar FC, ndërsa hungarezët në llogari të Shkëndijës do të paguajnë dëmshpërblim për blerjen e kartonit të futbollistit një vit para skadimit të kontratës së tij me kuqezinjtë (30.06.2020).

Visar Musliu largohet nga Shkëndija pas një viti e gjysmë, periudhë gjatë së cilës fitoi 3 trofe me kuqezinjtë, 2 kampionate dhe 1 Kupë. Ai zhvilloi 62 paraqitje zyrtare me fanellën e Shkëndijës (43 kampionale, 7 në Kupë dhe 12 në Europë), duke shënuar 9 gola (6 në kampionat dhe 3 në Kupë).

Pas firmosjes me kuqezinjtë në shkurt të vitit 2018, Musliu shpejt u promovua si shtyllë e mbrojtjes, duke dhënë kontribut të madh në sukseset e skuadrës, ndërsa do të mbahet mend edhe për dy golat e tij në finalen e Kupës së Maqedonisë (2018) kundër Pelisterit të fituar 3:0 nga Shkëndija.

Të gjithë në KF Shkëndija falënderojnë Visar Musliun për kontributin e dhënë në fanellën kuqezi, ndërsa i dëshirojmë gjithë të mirat dhe suksese në të ardhmen.

Lojtari më i mirë në Maqedoninë e Veriut, vlerësohet mbrojtësi shqiptar

Sport Ekspres — Sun, 21 Jul 2019 17:13:36 +0000

Qendërmbrojtësi i Shkëndijës së Tetovës, Visar Musliu, është shpallur si futbollisti më i mirë i kampionatit të Maqedonisë së Veriut nga media maqedonase “MAKFUDBAL”. Mbrojtësi i lindur në Gostivar ka qenë një ndër lojtarët kyç në suksesin e skuadrës tetovare, ndërsa ka dhënë dhe një kontribut te përfaqësuesja e Maqedonisë së Veriut, ku është një titullar i padiskutueshëm.

Futbollisti 24-vjeçar ka dhe një vit kontratë me Shkëndijën, por gjasat që janë që klubi tetovar ta shesë lojtarin te një skuadër e huaj. Për momentin është folur për një interesim të skuadrave të ndryshme në Hungari, por e ardhmja e Musliut mbetet ende një enigmë.

Ofertë zyrtare, 500 mijë euro për yllin e Shkëndijës!

Sport Ekspres — Fri, 21 Jun 2019 11:53:20 +0000

Visar Musliu, për t’iu bashkuar Shkëndijës së Tetovës, bëri një lëvizje befasuese një vit më parë. Ai shfrytëzoi klauzolën që e linte të lirë nga Vardari për t’u transferuar jashtë Maqedonisë. Nënshkroi me Prishtinën dhe u huazua te kuqezinjtë në janar të vitit 2017.

Në 18 muaj fitoi gjithçka me Shkëndijën e Tetovës dhe tashmë ka një ofertë nga Hungaria për të. MOL Vidi kërkon shërbimet e tij dhe sipas “Sportmedia.mk” është bërë një ofertë zyrtare. Kuqezinjtë, nëse vendosin ta shesin, përfitojnë shumën e 500 mijë eurove.

MOL Vidi ka qenë i qartë dhe pret një përgjigje në harkun kohor të tre ditëve. Shuma që ata ofrojnë është e konsiderueshme dhe te Shkëndija duhet të mendohen mirë. Në fakt dyzimi është i madh, pasi do të duhet të gjendet një tjetër mbrojtës.

Objektivi i tyre është kualifikimi në grupet e Champions League ose Europa League. Musliu është një nga pikat më të forta të Shkëndijës dhe normalisht për trajnerin Qatip Osmani do të ishte një humbje e madhe. Shumë shpejt edhe do të vendoset për fatet e mbrojtësit, i cili te MOL Vidi do kishte mundësinë të luante në nivele më të larta.