“Ka shumë lajme të rreme rreth emrave që mund të vinë. Jorente? Ai është një lojtar i fortë, por nuk do të them nëse ai është i duhur për projektin tonë apo jo. De Rosi në fund ndjeu se nuk mund të luante për një tjetër klub italian. Komiso ka sjellë një atmosferë të mirë në klub. Të dërguarit e tij po bëjnë një punë shumë të mirë për të ndërutar një ekip cilësor. Jemi të lumtur që jemi në Nju Jork dhe shpresoj të bëjmë tre ndeshje të mira”, u shpreh Montela.

Në intervistën e dhënë për “DAZN”, trajneri i ekipit toskan foli mbi gjendjen e ekipit të tij, ku theksoi se skuadra duhet të gjejë forca për të nisur gjithçka nga e para.

“Skuadra është e frikësuar, dukej sikur po priste që kundërshtari të shënonte. Na mungoi vetëbesimi në pjesën e parë. Në të dytën treguam një tjetër fytyrë, kjo dhe falë tifozëve që ishin të zhurmshëm deri në fund”.

“Na duhet unitet. Jemi kthyer në një ekip mazokist, po ndëshkojmë veten. Duhet t’ia nisim nga e para dhe t’i japim këtij qyteti atë që meriton. Kjo e sotmja ishte një ndeshje ku meritonim barazimin, por ishim të pafat.”

E ardhmja – “Po pres për të nisur punën me një ekip të ri. Për momentin po shijoj pushimet me familjen time dhe ndihem shumë i qetë. Nuk e kam problem për t’u rikthyer jashtë Italisë, ose në ndonjë klub italian. Vitin e kaluar me Seviljen morëm kënaqësi të mëdha në kupa, por nuk na eci mirë në kampionat. Në fund mbaroi keq, por do të isha gati të kthehesha të trajnoja jashtë Italisë.”

Kampionati – “Seria A është gjithmonë e vështirë. Niveli është rritur me ardhjen e Ronaldos, i cili ka rritur rivalitetin. Shumë skuadra kanë ndryshuar dhe duhet pak kohë, por niveli do të jetë më i lartë krahasuar me sezonin e kaluar.”

Milan – “Milanin vazhdoj e ndjek me melankoli dhe dashuri. U formua një ekip shumë i mirë, puna ime nuk ishte e plotë, por nuk ndjej keqardhje, ose pakënaqësi. Skuadra është përforcuar me një lojtar të madh si Higuain, të rinjtë po rriten dhe mund të përmirësohen akoma. Jam i çmendur prej vitesh për Higuain, edhe pse Manxhukiç e ka treguar që është i dobishëm për ekipin.

Nuk po flas për Ronaldon, i cili i përket një tjetër kategorie, por Higuain është ai, i cili më tërheq vëmendjen kur e shoh në televizor duke luajtur. Kutrone është një lojtar që mund të përmirësohet gjithmonë, ka një zemërim të pabesueshëm, por taktikisht nuk e komentoj dot nëse mund të luajë me Higuain.”

Fiorentina – “Në Firence kam kaluar tre vite të mrekullueshme, një qytet unik, por të shohim se çfarë do të ndodhë në të ardhmen.”

VAR – “VAR-i e ka përmirësuar futbollin dhe mbrojtësit janë më të kujdesshëm brenda zonës. Do të më pëlqente të kisha luajtur me VAR, sepse zemërimi rritet shumë kur pëson një episod kundër. Mendoj që VAR-i mund të përfshihet në Champions në faullet e rënda, në ofsajdët dhe në rastet kur topi ka kaluar vijën, ose jo.”

Kombëtarja e Italisë – “Të rinjtë nuk gjejnë hapësira, sepse trajnerëve u kërkohen menjëherë rezultate. E kuptoj Mançinin, por nëse nuk bëhet e detyrueshme të luajnë një numër minimal i lojtarëve të rinj italianë, çdo trajner do jetë i detyruar të fusë në lojë skuadrën që është gati për lojë.”

Napoli – “Ekipi po gjen identitetin e tij me Ançelotin, janë më shumë pragmatistë, por trofetë fitohen me pragmatizëm dhe jo me lojë të bukur.”