Në vitin 2012, Vinçenco nuk u lejua të mbante armë zjarri për shkak se është parë disa herë në shoqërinë e anëtarëve të grupimit mafioz, por pavarësisht kësaj, ai është kapur me një armë. 38-vjeçari mohon akuzat e bëra në prononcimin e bërë për “Le Iene”.

“Unë dhe babai im jemi të pafajshëm dhe i besoj atij verbërisht. E vërteta do të dalë në pah. Kur je i famshëm, ka njerëz që janë pro dhe kundër teje. Ka patur dhe 119 dënime të tjera dhe janë dhe dy faza të tjera gjykimi, por në gazeta lexohet vetëm emri im. Një ditë isha në një ‘McDonald’ me fëmijët e mi, kasierja më njohu dhe jua tregoi një gjë të tillë personelit. Nga kuzhina erdhi një koment i turpshëm ‘ah, ky mafiozi’. Unë kam frikë vetëm të dëgjoj fjalën ‘Ndangheta’, përfundon ish-sulmuesi i kombëtares italiane.

Prokurori i çështjes kërkoi 6 vite burg për Iakuintën, por gjykatësi e dënoi vetëm për akuzën  e armëmbajtjes pa leje. Në dhjetor të 2015-ës në shtëpinë e italianit u gjendën dy armë zjarri të tipit pistoletë. Iakuinta u mundua të shfajësohej duke thënë se armët i kishte marrë për gjueti dhe kishte ndërmend t’i regjistronte në një datë më të vonshme.

Babai i Iakuintës, Xhuzepe, e ka pësuar shumë më keq se i biri. Biznesmeni 61-vjeçar është dënuar me 19 vite burg si pjesëtar i organizatës mafioze. I ati i ish-futbollistit të Juventusit është një emër i njohur për agjencitë ligjzbatuese në Kalabri. Juridiksioni i shtetit italian i mundëson Vinçenco Iakuintës të jetë i pafajshëm nëse ai e apelon çështjen, ndërsa babai i tij do të mbahet në paraburgim ose arrest shtëpie pasi mbi të rëndon një akuzë shumë më e rëndë.