Afrikani pëlqehet shumë nga Ole Gunar Solskjaer, trajneri i Mançester Junajtid, ekip në të cilin Zaha luajti një sezon. Në fakt vetëm 28 minuta dhe aspak më shumë. David Mojes nuk e preferonte fare atë.

Në një prononcim për “Daily Mail”, sulmuesi sulmon ashpër klubin nga Mançesteri. Ai mund të luajë në çdo ekip, por jo më për “Djajtë e Kuq”.

“Mançester Junajtid u përpoq të më shkatërronte mua dhe karrierën time. Kur u lashë jashtë listës së Champions Ligës dhe në vendin tim u thirr Adnan Januzaj, i cili nuk kishte luajtur asnjë minutë me ekipin e parë, e kuptova që bëhej fjalë për një situatë shumë më serioze seç e imagjinoja. Çdo gjë kishte shkuar përtej arsyeve sportive. Nuk flitej më për futboll ose aftësi, por çfarë mund të bëja unë i shkreti?”, komenton Vilfrid Zaha.

I talentuari Zaha nuk luante dhe shkaku ishte banal. Flitej për një lidhje me vajzën e trajnerit Mojes, por Zaha e mohon këtë fakt. 25-vjeçari ka zbuluar për “ShortList” momentet e vështira, mënjanimin e të gjithëve dhe faktin që u detyrua të kalonte situatën e vështirë fillikat i vetëm.

“Është e vështirë të pranosh se si shkoi ajo aventurë. Nuk është e thjeshtë të bëhesh pjesë e Mançester Junajtid, kështu që fakti që nuk të japin asnjë shans, nuk është maksimumi. Pas asaj që kalova te Junajtid, e di që mund të përballoj çdo lloj gjëje. Qarkullonin thashetheme se nuk luaja, sepse shkoja në shtrat me vajzën e trajnerit, i cili ishte Mojes, dhe askush në klub nuk tentoi të më mbronte nga ato akuza.

U detyrova të luftoja me demonët e mi i vetëm, pa ndihmën e askujt. Nuk kisha asnjë shok pranë, sepse klubi vendoste dhe ku duhet të jetoja. Nuk më dhanë një makinë, siç bënin me të gjithë lojtarët. E përjetova atë ferr i vetëm, larg familjes time. Ndonjëherë e harrojmë që futbollistët janë qenie humane.

Kur isha të Junajtid kisha shumë para, por isha i trishtuar dhe në depresion. Njerëzit mendojnë që jeta jote është ndryshe, sepse ke para, je i famshëm dhe nuk të trajtojnë si gjithë të tjerët”, përfundon sulmuesi i Kristal Palas.